«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք «Ժառանգություն» խմբակցության պատգամավոր, անկուսակցական Թեւան Պողոսյանի հետ:

Ո՞վ է Թեւան Պողոսյանը:

Կյանքը եւ հայրենիքը սիրող մարդ:

Ձեր բնավորության մեջ ո՞ր գծերն եք հավանում եւ որո՞նք տանել չեք կարողանում:

Հավանում եմ հետեւողականությունը, ճշտապահությունը, պահանջկոտությունը սեփական անձի նկատմամբ: Իսկ բնավորության բացասական գծերը աշխատում եմ շտկել:

Ասում են` փոքր ժամանակ չար երեխա եք եղել: Ի՞նչ չարաճճիություններ էիք անում:

Քնել չեմ սիրել ու ահավոր հետաքրքրասեր եմ եղել:

Դուք ձեր երեխաներին չեք ապտակել, բայց մի անգամ ձեր հայրիկի կողմից ապտակի եք արժանացել: Կպատմեք` ինչպես եղավ:

Կարեւորն այն է, որ կյանքիս լավագույն դասերից մեկը ստացա:

Ձեր հայրը Լեռնային Ղարաբաղի նախկին վարչապետ Ժիրայր Պողոսյանն է: Հայրիկի պաշտոնը ի՞նչ փակ դռներ է բացել ձեզ համար:

Հայրս բացի գենետիկ եռանդից ամենակարեւոր «դուռն» է բացել՝ ոգեշնչել է լավ սովորել:

Հարուստ կենսագրություն ունեք թե՛ սովորելու, թե՛ աշխատանքի հետ կապված: Այդ կենսագրության մեջ ամենահպարտանալու կետը ո՞րն է:

Դրանք շատ են, ամեն օրը մի նոր նվաճում է, բայց հպարտանում եմ այն մարդկանցով, ում հետ միասին այդ ճանապարհն եմ անցնում:

Մի առիթով ասել եք, թե ինչին որ հասել եք կյանքում, միշտ ինչ-որ չափով հիմնված է եղել երազանքների վրա: Պատգամավոր դառնալը վերջի՞ն, թե՞ նախավերջին երազանքն էր:

Սիրում եմ երազել եւ պատրաստվում եմ դեռ երկար ապրել:

Ո՞րն է ձեր երազանքների պաշտոնը, որ կցանկանայիք զբաղեցնել կամ կոչումը, որ կցանկանայիք ստանալ:

Պապիկ՝ շրջապատված թոռնիկներով, ծոռներով ու կոռներով: Այս հարցում էլ եմ հեռուն երազում:

Ի՞նչ է փոխում պատգամավորական մանդատը ձեր կյանքում: Ձեր ներկայությամբ ի՞նչ եք բերելու ԱԺ, որ մինչ այդ չկար:

Պատասխանատվությունը կավելանա. որոշումներ ընդունելիս խորհուրդներ տալու առումով:

Սկզբունքներ, որոնք խախտել եք:

Սկզբունքները պետք չէ խախտել, այլ պարագայում դրանք այլեւս սկզբունք չեն:

Ձեր խոցելի կողմերը:

Անխոցելի մարդ չկա, ինչպես նաեւ՝ անսխալ: Ես նույնպես բացառություն չեմ:

Ի՞նչ սիրելի արտահայտություններ ունեք, որոնք օրվա ընթացքում հնարավոր է հաճախակի ասեք, բացի «Չվախենաս, դուխով»-ից:

Ապրես:

Ինչի՞ համար եք զղջում:

Չեմ զղջում արածներիս համար, զղջում եմ միայն չարածներիս համար:

Ինչո՞ւմ եք ամենաշատը ձեզ մեղադրում:

Ոչնչում:

Ի՞նչ ստեր եք հաճախակի ստիպված ասել:

Արդեն ասել եմ, որ չեմ զղջում արածներիս համար:

Ի՞նչ կփոխեիք ձեր մեջ:

Ես այսպիսին եմ՝ այն Թեւանը, ինչպիսին կամ...

Զայրանում եք, երբ...

Մարդիկ ոչինչ չեն անում, ծույլ են եւ աննախաձեռնող, բայց օր ու գիշեր բողոքում են:

Զարմանում եք, երբ...

Ինչ-որ մի բան ստացվում է առանց չարչարվելու:

Ձանձրանում եք, երբ..

Մենակ եմ լինում:

Հուսահատվում եւ հիասթափվում եք, երբ...

Հույսը չի մեռնում քանի դեռ մենք կանք, իսկ հիասթափությունն իմ էության մեջ չկա ընդհանրապես:

Հպարտությունը...

Ընտանիքս, ընկերներս:

Ուրախությունը...

Ցանկացած բարեկամի յուրաքանչյուր ժպիտ:

Տխրությունը...

Մարդկային կորուստ:

Հոգսերը...

Շատ են, բայց ես կենսուրախ, կենսախինդ եւ համառ եմ: Այնպես որ՝ դուխով:

Ամենամեծ հաղթանակը եւ պարտությունը:

Սերն ընտանիքումս եւ մեծ ընկերական շրջապատը հաղթանակս է: Պարտվողներից չեմ:

Երբեւէ ամաչե՞լ եք ձեր արածի կամ ասածի համար:

Գուցե

Ամենահամարձակ քայլը:

Մայրիկիս ասելը, որ հիվանդ է քաղցկեղով, ու խնդրելը, որ միասին պայքարենք հիվանդության դեմ: Ցավոք միայն 6 տարի տեւեց:

Ամենամեծ նյութական հարստությունը, որ ունեք:

Ես հարուստ եմ ընտանիքովս, երեխաներովս եւ ընկերներովս: Իմ ձեռքով պատրաստած գինին ավելին է իմ համար, քան ցանկացած իր:

Ձեր երջանկությունը ի՞նչ գույն ունի:

Նարնջագույն:

Ամենառոմանտիկ օրը:

Սեպտեմբերի 23, 1993:

Եթե նորից ծնվեիք, ո՞ր դարաշրջանում եւ ո՞ր երկրում կցանկանայիք ապրել:

Այն ինչ եղել է՝ կարելի է իմանալ դասագրքերից, այն ինչ կլինի՝ մենք ենք արարում: Սա է իմ ժամանակահատվածը, եւ լավագույնն այն պատվով ապրելն է:

Ո՞վ է Հայաստանի լավագույն քաղաքական գործիչը:

Ամեն ժամանակ իր հերոսներն է ունենում: Լավագույն քաղաքական գործիչր նա է, ով ի շահ եւ ի բարօրություն իր երկրի է աշխատում: Ինձ շատ են ոգեշնչել հայրենասիրության եւ պետության մասին հայրիկիս տված խրատները:

Գրականության մեջ տղամարդու եւ կնոջ սիրելի կերպարը:

Տղամարդու կերպարը Աթոսն է, իսկ կնոջ սիրելի կերպարը՝ Մարգո թագուհին:

Ձեր սիրելի նկարիչները եւ կոմպոզիտորները:

Դալի եւ Ալեքսանդր Հեքիմյան:

Վերջին կարդացած գիրքը:

Պարույր Սեւակի բանաստեղծությունների ժողովածուն եմ վերընթերցում եւ զանազան մասնագիտական հոդվածներ հիմնականում:

Ե՞րբ եւ ի՞նչ առիթներով եք արտասվել: Ձեր վերջին արտասուքը:

Երեխաներիս ցանկացած հաջողություններից հուզվում եմ: Մի քանի օր առաջ, երբ հեռացատկի մրցույթում Անժելաս առաջին տեղն էր գրավել:

Ձեր մասին ամենաանհեթեթ առասպելը կամ բամբասանքը:

Այդ երկու երեւույթներին առողջ հումորով եմ վերաբերվում եւ չեմ ծանրաբեռնում հիշողությունս:

Ամենաշատը ինչքա՞ն եք սպասեցրել եւ ինչքա՞ն եք սպասել:

Ուշանալ չեմ սիրում եւ ճշտապահ եմ: Իսկ ամենաշատը սպասել եմ 14 տարի 10 ամիս:

Հայաստանում ի՞նչն է ամենից շատ ձեզ նյարդայնացնում:

Օտարամոլությունը:

Համաշխարհային կանանցից ո՞վ է ձեզ համար կանացիության եւ գեղեցկության էտալոնը:

Ինձ համար աշխարհում կանացիության եւ գեղեցկության էտալոնը կինս է: Նա ինձ 5 երեխա է պարգեւել, եւ դա է իմ աշխարհը:

Ինչպիսի՞ն են ձեր հարաբերությունները ձեր կնոջ ծնողների հետ, կոնֆլիկտներ չե՞ն առաջանում: Վերջին թարմ անեկդոտը փեսաների սիրելի զոքանչների մասին:

Ես կարողանում եմ միշտ պահպանել մտերիմ հարաբերություններ կնոջս բոլոր բարեկամների հետ: Աներոջս հետ լավ ընկերներ ենք, իսկ զոքանչս, ցավոք, 5 տարի առաջ մահացել է:

Անցած սերեր:

Համակրանքներ եւ հրապուրանքներ եղել են, բայց սիրել եւ սիրում եմ մեկ անգամ:

Կանայք, ինչպիսի՞ն են նրանք, որո՞նք են հայ կանանց թերությունները եւ առավելությունները:

Կանայք տարբեր են լինում:

Ձեր սիրո պատմությունը: Կարծեմ ձեր մոտ սեր էր առաջին հայացքից, բայց ձեր կինը ձեզ մերժեց եւ հայտարարեց, որ դուք կլինեք վերջին տղամարդը, ում ինքը կընտրի: Կասեք, թե ինչպես համոզեցիք, որ ամուսնանա ձեր հետ, ի՞նչ խոստումներ տվեցիք եւ դրանցից որո՞նք չեք իրականացրել:

Թե ինչպես համոզեցի՝ իմ գաղտնիքն է: Խոստումներն ամեն օր ավելանում են, որոնք սիրով շարունակաբար իրականացնում եմ:

Նախքան ամուսնանալը պլանավորել էիք 13 երեխա ունենալ, ինչո՞վ է պայմանավորված այդ թվի ընտրությունը, ցանկանում էիք ձեւավորվել Պողոսյանների ընտանիքի ֆուտբոլային թի՞մը: Այժմ 5 երեխա ունեք, պլանավորո՞ւմ եք եւս 8 երեխա ունենալ:

Ճիշտ եք: 13 թիվը ուղղակի գաղափար էր՝ մեծ ընտանիք ունենալու: Իսկ մնացածը կյանքը ցույց կտա. Աստծո կամոք:

4 աղջիկ ունեք, մեկ տղա, նպատակը արու զավակ ունենա՞լն էր: Դուք եւս այն տղամարդկանցից եք, որոնց համար սկզբունքային է «տղա ունենալը»:

Սկզբունքային էր շատ երեխա ունենալը: Եթե նպատակը միայն տղան լիներ, ապա 4 հրաշք աղջիկ չէի ունենա: Հիմա 5 գանձ ունեմ:

Ի՞նչ հոբբիներ ունեք, օրինակ`գիտեմ, որ գինեգործությամբ եք զբաղվում, հնարավոր է մի օր վայր դնենք մանդատը եւ ձեզ նվիրեք գինգործության բիզնեսին;

Գինեգործությունից բացի այլ հոբբիներ էլ ունեմ: Այս կյանքում ամեն ինչ հնարավոր է, կյանքը ցույց կտա: Առաջիկա 5 տարիներին ծառայելու եմ Ազգային Ժողովում:

Իսկական տղամարդը չի խմում ,չի ծխում, չի խաղում, «լեւեի» չի գնում, երբեք չի վիճում ու պարզապես գոյություն չի ունենում Նշվածներից ո՞րն եք անում կամ չե՞ք անում:

Առիթներին խմում եմ, ծխելը թողել եմ 3 տարի առաջ, չեմ խաղում, իսկ տեսակետս պաշտպանել գիտեմ: Բարոյապես կայուն, ֆիզիկապես առողջ տղամարդ եմ:

Ձեր հարցը շարքին մասնակցող հաջորդ պատգամավորին:

Ի՞նչ է տիեզերքը Ձեզ համար:

Շարքին մասնակցող նախորդ պատգամավորը ՕԵԿ-ից Խաչիկ Հարությունյանը ձեզ հարցնում է, թե եթե ունենայիք կախարդական փայտիկ ու այն օգտագործելու մեկ հնարավորություն, ինչ կանեիք:

Կերազեի մարդիկ չհիվանդանեին կամ բոլորըա ռողջ լինեին:

Նշենք, որ Թեւան Պողոսյանը համակարգչային տեխնոլոգիաների ինժեներ է, սովորել է նաեւ Ամերիկյան համալսարանի քաղաքագիտության եւ միջազգային հարաբերությունների ֆակուլտետում: Աշխատել է Կենտրոնական բանկում, Մարդկային զարգացման միջազգային կենտրոնի  գործադիր տնօրեն է:

Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե Հովհաննիսյանի, Լեւոն Մարտիրոսյանի, Նաիրա Կարապետյանի, Հայկ Գրիգորյանի, Մարգարիտ Եսայանի, Գարեգին Նուշիկյանի, Հովհաննես Սահակյանի, Արտակ Զաքարյանի, Կարինե Աճեմյանի, Արտակ Դավթյանի, Սամվել Ֆարմանյանի, Շիրակ Թորոսյանի, Հայկ Բաբուխանյանի, Սուքիաս Ավետիսյանի, Կարեն Ավագյանի, Էդուարդ Շարմազանովի, Տաճատ Վարդապետյանի, Սամվել Նիկոյանի, Ռուզաննա Մուրադյանի, Արթուր Գեւորգյանի ,ՕԵԿ-ից` Հեղինե Բիշարյանի, Կարեն Բոթոյանի. ԲՀԿ-ից`Տիգրան Ուրիխանյանի, Էլինար Վարդանյանի, Վահե Էնֆիաջյանի , Նաիրա Զոհրաբյանի, Գուրգեն Արսենյանի, Վահան Բաբայանի,Արմեն Ավետիսյանի, Բազմասեր Առաքելյանի, Միքայել Մելքումյանի, ՀԱԿ-ից Լյուդմիլա Սարգսյանի, Հրանտ Բագրատյանի,Գագիկ Ջհանգիրյանի, Արամ Մանուկյանի, «Ժառանգությունից»` Ռուբեն Հակոբյանի, Խաչատուր Քոքոբելյանի, Ալեքսանդր Արզումանյանի, ՀՅԴ-ից` Արծվիկ Մինասյանի հետ, Աղվան Վարդանյանի, անկախ պատգամավոր Էդմոն Մարուքյանի հետ:

Շարքը` Ինգա Մարտինյանի