«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք Միավորված աշխատանքային կուսակցության նախագահ, «Բարգավաճ Հայաստան» խմբակցության պատգամավոր Գուրգեն Արսենյանի հետ:

5 ածականով բնութագրեք ձեզ:

Մեկ բառով` նորմալ:

Ի՞նչ առավելություններ ունեք:

Ամեն մարդ մի ձեւ է, եւ մարդը չի կարող ինքը իր առավելությունների մասին խոսել: Այդ հարցը ինձ համար տարօրինակ է:

Ձեր թերությունների մասին հարցն է՞լ է տարօրինակ:

Իմ թերությունները իմ թերություններն են, չեմ ուզում նշել, իմ անձի հետ կապված պլյուսները եւ մինուսները աշխատում եմ թողնել իմ անձնական օգտագործման համար:

Իսկ թուլություննե՞րը:

Բարսելոնան:

Կյանքի եւ մահվան հանդեպ ձեր վերաբերմունքը:

Աստծո կողմից մեզ տրված հնարավորություն օգտագործել ողջամտորեն, դա կյանքի հետ կապված, իսկ մահվան հետ կապված` ինքդ որոշես երբ եւ ինչի համար կարող ես մեռնել:

Հիմա դուք որոշե՞լ եք երկուսի դեպքում եւ ի՞նչ եք որոշել:

Ես գիտեմ` ինչի համար կարելի է մեռնել: Չեմ ուզենա ասել, դա ամեն մարդու անձնական խնդիրն է:

Կյանքից ստացած կարեւորը դասերը:

Անընդհատ են, որովհետեւ կյանքը միակ բանն է, որ երբեք չի կրկնվում:

Հայաստանում ի՞նչն է ձեզ ամենից շատ նյարդայնացնում:

Նյարդայնանում եմ նրանից,որ Հայաստանի քաղաքացիները չեն կարողանում բարեկեցիկ ապրել իրենց երկրում:

Հաջողության հասնելու ձեր բանաձեւը:

Լինել այնպիսին, ինչպիսն ես:

Ձեր երջանկությունը գո՞ւյն ունի:

Երջանկությունը տարբեր պահերի տարբեր է: Այս պահի դրությամբ ես երջանկության փուլի մեջ չեմ, որ իմանամ:

Ի՞նչ է պակասում ձեզ` երջանկության փուլի մեջ հայտնվելու համար:

Եթե մարդիկ կարողանային այդ հարցի պատասխանը տային, այդ մարդկանց կարելի կլիներ դասել մարդկության մեծերի շարքերը:

Ձեր կյանքի ամենամեծ սխալները:

Սխալները մեծ եւ փոքր չեն լինում, լինում են ճակատագրական կամ ողբերգական:Ես ճակատագրական կամ ողբերգական սխալներ չեմ գործել:

Իսկ կա՞ ինչ-որ մի բան, որ ասել կամ արել եք,եւ մինչեւ հիմա չեք ներում ձեզ:

Հնարավոր է,որ կա, բայց մինչեւ հիմա չեմ ներումը այդ ձեւակերպումը չէ:

Դուք ձեր խղճի հետ հաշտ ապրո՞ւմ եք, օրինակ` երբ գիշերը քնում եք ինչ-որ բան ձեզ չի՞ տանջում:

Ես իմ խղճի հետ հաշտ ապրում եմ, խիղճը գիշերային կատեգորիա չէ, մշտական գործող կատեգորիա է ամբողջ կյանքի ընթացքում:

Ի՞նչ վտանգներ եք հաղթահարել կյանքում:

Ապրելու հետ կապված որոշ առաջացած վտանգներ:

Ամենամեծ սուտը, որ ասել եք:

Ստախոսությունը` որպես գործիք, ես չեմ ողջունում եւ չեմ կիրառում, սակայն լինում են դեպքեր եւ իրավիճակներ, երբ որ սուտ ես ասում` պայմանների պահանջով: Բայց, ընդհանուր առմամբ, ստախոսության ոչ ջատագով եմ, ոչ էլ կիրառող:

Ձեր կյանքի ամենահամարձակ քայլը:

90թ Անկախության բանակին հավաքագրվելն է:

Ամենառոմանտիկ օրը:

Չի լինում, որ մեկը լինի ամենառոմանտիկը, բոլորն էլ տարբեր հնարավորություններ, տարբեր օրեր են:

Ձեր հույսը:

Հասուն մարդու հույսը իր զավակներն են:

Հայաստանում ո՞վ է լավագույն քաղաքական գործիչը, ում գործունեությամբ հիանում եք:

Քաղաքական գործչի գործունեությամբ հիանալու նկրտումներ կամ ցանկություններ առայժմ չունեմ: Հիանալու խնդիր էլ չկա, պարզապես փորձում են, որ այն քաղաքական գործիչները, ում հետ շփվում եմ, լինեն արդյունավետ:

Լավագույն մարդը:

Իմ գործընկեր, այժմ լուսահոգի Գրիգոր Ղոնջեյանը:

Ի՞նչ կցանկանայիք փոխել ձեր մեջ եւ ձեր կյանքում:

Ժամանակին ուշադրություն չեմ դարձրել, երեւի արդեն հիմա ուշ է մի քանի օտար լեզուների տիրապետությունը:

Չասված խոսքեր եղե՞լ են ձեր կյանքում:

Իհարկե, եղել են:

Վերջին անգամ ե՞րբ եք արտասվել` ֆիլմի կամ գրքի հետ կապված:

Կան ֆիլմեր, որոնք դիտում ես եւ կրկին դիտում ես, անընդհատ ազդում են արցունքագեղձերի աշխատանքի վրա: Այդպիսի ֆիլմեր շատ կան:

Ամենամեծ հաղթանակը եւ պարտությունը:

Հաղթանակը 2003թ խորհրդարանական ընտրություններում մեր քաղաքական ուժի հաղթանակն է, երբ մենք ներկայացվեցինք խորհրդարանում, ամենամեծ պարտությունը դեռ չի եղել:

Ամենավատ սովորությունը:

Ծխելն է;

Ի՞նչ ֆոբիաներ ունեք:

Ինչպես բոլոր նորմալ մարդիկ, վախենում եմ օձերից:

Նյութական ամենամեծ հարստությունը, որ ունեք:

Դա գույքային արժեքների հանրագումար է, որ ես ունեմ:

Այդ հարստությունը` փող, բնակարան, ավտոմեքենա, ի՞նչ է ձեզ համար:

Առարկայական ոլորտի դրսեւորում է, ոչ մի բան:

Ասում են կարեւորը փողը չէ, այլ դրա քանակը, դուք փողի «քչությունից» կամ «շատությունից» նեղվե՞լ եք:

Հնարավոր չէ փողի քչությունից բավարարված լինել, շատության հետ կապված էլ ամեն մեկը մի կերպ է արձագանքում:

Խաղատներ այցելելիս ամենամեծ գումարը, որ պարտվել եւ հաղթել եք, ո՞րն է եղել:

Քանի որ ես սպորտային ակումբներ ունեմ, ֆուտբոլային մի խաղադրույքի արդյունքում ես 100 միլիոն դրամ գումար եմ շահել, այցելեք «Վիվառո», կասեն, թե  որն է եղել ամենամեծ պարտությունը:

Գուրգեն Արսենյանը` խոհանոցում:

Գուրգեն Արսենյանը` խոհանոցում, որպես սպառող է ներկա լինում:

Ձեր սիրտ տանող ճանապարհն է՞լ է ստամոքսով:

Իմ սիրտ տանող ճանապարհը բազմազան է, այդ ճանապարհներից մեկն էլ կարող է  լինել նաեւ ստամոքսը` նայած օրգանիզմը ինչ վիճակում է:

Անցած սերեր:

Նորմալ: Մանկություն, պատանեկություն, երիտասարդություն, հետո հասուն տարիք, ո՞նց կարող է չլինել:

Համաշխարհային հայտնի կանանցից գեղեցկության էտալոնը ձեզ համար ո՞վ է:

Ժամանակակից կինորավեստում հայտնի Ումա Տուռմանը եւ իտալացի հայտնի դերասանուհի Օրնելիա Մուտին: Երկոսւն էլ ինձ համար կնոջ իեդալին մոտեցող են:

Ձեր ընտրյալը, ինչպիսի՞ն է նա:

Կինս է, այնպիսին է, ինչպիսին կա, ցանկացած մարդ անկրկնելի է:

Ի՞նչ խենթություններ եք արել նրա համար, օրինակ` սերենադ երգել, ռոմանտիկ ընթրիք կազմակրեպել եւ այլն:

Բազմաթիվ, երգեցողության հետ կապված Աստված ինձ չի տվել այդ հնարավորությունը, որ կարողանամ երգել:

Երեխաների դաստիարակությամբ որքանո՞վ եք զբաղվում, ի՞նչ խրատներ եք տալիս;

Բոլոր խրատները տալիս եմ, լսող չկա:  Մնացած գործիքներն էլ եմ կիրառում, այդ թվում` խրախուսման եւ պատժի համապատասխան միջոցներ:

Օրինակ ձեր հայրիկը ձեզ ապտակե՞լ է, եւ դուք ձեր երեխաներին ապտակո՞ւմ եք:

Ինչ վերաբերում է իմ հորը, Աստված լուսավորի իր հիշատակը, իր դաստիարակության պրոցեսում ֆիզիկական ազդեցության գործոնը շատ մեծ եւ էական դեր ուներ:

Այսինքն, լավ ծեծե՞լ է ձեզ:

Դե արդեն ասացի էլի, տեղը տեղին: Ինչ կապված է իմ երեխաների հետ, իմ օրակարգում այդ գործիքը այն տեղը չունի, որը որ եղել է հորս մոտ, հորս համեմատ շատ նվազ եմ կիրառում:

Թե չլիներ կինն ու գինին, ի՞նչը կփրկեր կյանքում հերոսին, ձեզ կինն ու գինին փրկո՞ւմ են, թե՞ կործանում:

Ես կարծում եմ, որ հերոսի կարգավիճակով հանդես չեմ գալիս, ինչ վերաբերում է կանանց, գինուն, սիրուն, երջանկությանը, դրանք մարդու կյանքում ունեն իրենց տեղն ու դրսեւորումը:

Եթե նորից ծնվեիք, ի՞նչ կանեիք…

Օօօօօօ….այդ երկար օ-ով ավարտենք այս հարցը:

Շարքին մասնակցող նախորդ պատգամավոր` ՕԵԿ խմբակցության ղեկավար Հեղինե Բիշարյանը ձեզ հարցնում է, թե ինչ տեղ ունի ձեր կյանքում հավատը:

Լրջորեն:

Ձեր հարցը շարքին մասնակցող մյուս պատգամավորին:

Կցանկանայի լսեր իր տեսակետը` արդյոք Ֆուտբոլի Հայաստանի ազգային հավաքականը դուրս կգա Բրազիլիայում կայանալիք աշխարհի առաջնության եզրափակիչ փուլ:

Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե Հովհաննիսյանի, Լեւոն Մարտիրոսյանի, Նաիրա Կարապետյանի, Հայկ Գրիգորյանի, Մարգարիտ Եսայանի, Գարեգին Նուշիկյանի, Հովհաննես Սահակյանի, Արտակ Զաքարյանի, Կարինե Աճեմյանի, Արտակ Դավթյանի, Սամվել Ֆարմանյանի, Շիրակ Թորոսյանի, Կարեն Ավագյանի, Էդուարդ Շարմազանովի, Տաճատ Վարդապետյանի, ՕԵԿ-ից` Հեղինե Բիշարյանի,  ԲՀԿ խմբակցության պատգամավոր Տիգրան Ուրիխանյանի, Էլինար Վարդանյանի , Վահե Էնֆիաջյանի ,  Նաիրա Զոհրաբյանի, ՀԱԿ-ից Լյուդմիլա Սարգսյանի, Հրանտ Բագրատյանի, Գագիկ Ջհանգիրյանի «Ժառանգությունից»` Ռուբեն Հակոբյանի, Խաչատուր Քոքոբելյանի, Ալեքսանդր Արզումանյանի, ՀՅԴ-ից` Արծվիկ Մինասյանիհետ, Աղվան Վարդանյանի, անկախ պատգամավոր Էդմոն Մարուքյանի հետ:

Շարքը` Ինգա Մարտինյանի