«Բլից հարցազրույցներ ԱԺ պատգամավորների» հետ շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք ԱԺ «Օրինաց երկիր»  խմբակցության ղեկավար Հեղինե Բիշարյանի հետ:

Ինչպիսի՞ն ենք դուք` որպես մարդ, մայր, կին, հարեւան, ընկերուհի: Ամեն մեկի դեպքում նշել մեկ հատկանիշ:

Որպես մարդ հումանիստ եմ, որպես մայր` հոգատար, որպես կին` սիրող, որպես հարեւան`շփվող եւ որպես ընկերուհի`բնականաբար ընկերասեր:

Ո՞րն է ձեր առաքելությունը կյանքում, կամ այսպես ասած` ի՞նչ եք տանելու ձեզ հետ այս կյանքից  եւ ի՞նչ եք թողնելու ձեզնից  հետո:

Այս կյանքում իմ ամենակարեւոր առաքելությունն իմ զավակների գոյությունն է, եւ ինձանից հետո թողած աշխատանքը, որքան, որ ես կհասցնեմ: Իսկ այս կյանքից տանելու եմ այն, ինչ տանում են բոլորը, խոստանում եմ ավել ոչինչ չեմ տանելու:

Ի՞նչ կփոխեիք ձեր մեջ` թե արտաքինում, թե ներքին հոգեկան աշխարհում:

Յուրաքանչյուր մարդու բնությունից է տրվում թե արտաքինը եւ թե ներաշխարհը: Պարզապես ժամանակի ընթացքում մենք դրանք փոփոխում,  համապատասխանացնում ենք ժամանակի պահանջներին:

Որո՞նք են ձեր խոցելի կողմերը:

Իմ խոցելի կողմերից է նախ եւ առաջ իմ խիղճը, սիրելը, հավատալը եւ վստահելը, որպես մեկ ամբողջական արժեհամակարգ հաճախ չարաշահվում է:

Ո՞րն է ձեր կյանքի ամենահամարձակ քայլը:

Շարունակել ապրել առանց ծնողներիս եւ հաշտվել նրանց գոյությամբ երկնային կյանքում:

Ի՞նչ  չեք ներում ձեզ: Եւ հետաքրքիր է իմանալ նաեւ, թե ինչ երբեք չեք անի:

Չեմ ներում, որ մորս նման բազմազավակ մայր չեմ: Երբեք չեմ փորձի թռչել, քանի որ դրա համար չեմ ծնվել:

Մենախոսություն ձեր եւ ձեր միջեւ

Այո, միշտ տեղի է ունենում: Ինքս ինձ ասում եմ. բավական չէ ներդաշնակ լինես խղճիդ հետ:

Անկեղծ ասած...

Անհամբեր սպասում եմ, թե երբ եմ թոռնիկ ունենալու:

Զարմանում եք...

Զարմանում եմ, երբ հրաշքներ են տեղի ունենում, իսկ հրաշքներ լինում են:

Զայրանում եք...

Զայրանում եմ, երբ մարդիկ գիտեն, որ ես գիտեմ ճշմարտությունը, բայց ինձ փորձում են խաբել:

Հոգնում եք...

Հոգնում եմ թացը չորից զատելու հաճախ դժվարագույն գործից:

Ուրախանում եւ տխրում եք...

Ինձ ամենաշատը ուրախացնում են հարսանիքները, իսկ տխրում եմ, երբ մարդիկ հեռանում են երկրից:

Հուսահատվում եւ հիասթափվում եք...

Հուսահատությունն ու հիասթափությունը թույլ մարդկանց է բնորոշ:

Ո՞վ կամ ի՞նչն է ձեր մուսան կամ ներշնչանքի աղբյուրը:

Լավ ու բարի գործերը ավարտին հասցնելու մեծ ցանկությունն ու մղումը, տրամադրությունը, որը բխում է հենց այդ լավ ու բարի գործերից:

Ի՞նչ բարդույթներից եք ազատվել եւ այժմ ի՞նչ բարդույթներ ունեք, օրինակ`  լողափ գնալիս լողազգեստ հագնում եք:

Այն ինչ քաղաքակիրթ ու բանական է` ինձ մոտ բարդույթներ չեն առաջացնում:

Ո՞րն է սեր խոստովանելու լավագույն ձեւը: Օրինակ` դուք ինչպե՞ս եք սեր խոստովանել:

Առանց խոսքերի:

Հայաստանյան քաղաքական գործիչներից ո՞ւմ գործունեությամբ եք հիանում:

Ում գաղափարակիցն ու զինակիցն եմ, ու հավատում ու վստահում եմ այսօր:

Մինչ ամուսնանալը շա՞տ երկրպագուներ եք ունեցել եւ ի՞նչ խենթություններ են արել նրանք ձեզ համար:

Երկրպագուներ միշտ եղել են, խենթություններ նույնպես, բայց կարեւորը նա է, ում տալիս է քեզ ճակատագիրը:

Ո՞վ է ձեր տղամարդը եւ ինչո՞ւ եք հենց նրան ընտրել:

Ամուսնուս ընտրել եմ իր բազմաթիվ անհրաժեշտ հատկանիշների համար, որոնք կարող է իր մեջ կրել տղամարդը` սիրող, հոգատար, մեծահոգի, աշխատասեր, նպատակասլաց եւ այլն:

Թեւավոր խոսքն ասում է` իսկական տղամարդը չի ծխում, չի խմում, չի վիճում, «լեւի» չի գնում եւ պարզապես գոյություն չունի: Ըստ ձեզ` ով է իսկական տղամարդը

Իսկական տղամարդը նա է, ով սիրում է իր կնոջն ու երեխաներին, սիրում եւ ծառայում է իր հայրենիքին, ում համար ընտանիքն ու հայրենիքը բարձրագույն արժեքներ են:

Քաղաքականությամբ զբաղվելու պատճառով ընտանիքում ի՞նչ վեճեր են առաջացել եւ ինչպե՞ս են դրանք հարթվում:

Վեճերի չի հասել, բայց լուռ դժգոհություն եղել է, բայց ես միշտ ունեմ իմ ընտանիքի, առավել եւս իմ ամուսնու աջակցությունը, ով մտածում է, եթե կինը ուզում է ինչ որ գործով զբաղվել, ապա նրան պետք է օգնել, այլ ոչ թե խանգարել:

Դուք խանդո՞տ կին  եք, իսկ ձեր ամուսինը ձեզ խանդո՞ւմ է:

Իմ համոզմամբ խանդը անվստահության բարդույթ է, իսկ ես ու ամուսինս իրար վստահում ենք: Խանդը նաեւ սիրո անխուսափելի հետեւանքներից է, որով ցանկալի չէ առաջնորդվել:

Տնից դուրս գալուց առաջ ինչքա՞ն ժամանակ եք անցկացնում հայելու առջեւ:

Ոչ շատ երկար, այնքան ինչքան անհրաժեշտ է պատշաճ տեսք ունենալու համար:

Ասում են` կնոջ պայուսակի պարունակությունը պատմում է նրա մասին: Կխնդրեի հենց այս պահին նայեիք ձեր պայուսակը եւ թվարկեիք, թե ինչ կա այնտեղ:

Պայուսակիս մեջ կա փոքրիկ պայուսակ, որտեղ կան դիմահարդարման անհրաժեշտ պարագաներ, ակնոց, գրիչ ու թուղթ, թաշկինակ, ինֆորմացիայի կրիչ, բանալիներ, դրամապանակ...... մի խոսքով ազատ անկյուն չկա:

Աշխարհահռչակ գեղեցիկ տղամարդկանցից ո՞ւմ ընթրիքի հրավերը չէիք մերժի:

Ամուսնուս, ով դեռ աշխարահռչակ չէ:

Ձեր իմիջով որեւէ մեկը զբաղվո՞ւմ  է, ունե՞ք նախընտրելի բրենդներ, որոնց հագուստը եւ աքսեսուարները գնում եք:

Իհարկե ունեմ նախընտրելի բրենդներ, իսկ իմ իմիջով ես եմ զբաղվում:

Օրինակ` ամսական ինչքան գումար եք ծախսում ձեր արտաքին տեսքի վրա:

Ծախսում եմ այնքան, որ կարողանամ այլ անհրաժեշտ ծախսեր եւս կատարել:

Հարեւանների կամ ընկերուհիների հետ վերջին անգամ  ե՞րբ եք հավաքվել, բամբասել, սուրճ խմել եւ սուրճի գավաթ նայել:

Հարեւաններս հրաշալի մարդիկ են: Միասին հաճախ չէ, որ հասցնում ենք սուրճ խմել: Բամբասել չեմ սիրում: Ընկերուհիներիս հետ հաճախ սուրճ խմում եմ: Սուրճ խմել սիրում եմ, բայց սուրճի գավաթ նայելուց էլ շատ հեռու եմ:

Ասում են`  կանանց մեջ անկեղծ ընկերություն չկա, երբեւէ զգացե՞լ եք, որ ձեզ նախանձեն եւ ինչի՞ համար:

Ես բազմաթիվ ընկերներ ունեմ, որոնց հետ իսկապես անկեղծ ընկերություն ենք անում: Իսկ նախանձ ու չկամ մարդիկ միշտ էլ կան: Դա օրինաչափ է: Ինչպես ասում են` «Եթե դու թշնամիներ չունես, նշանակում է դու բնավորություն չունես»:

Քաղաքականության մեջ շատերը ձեզ համարում են խստաբարո կին, իսկ հետաքրքիր է` ինչպիսի սկեսուր կլինեք ձեր հարսի համար:

Իմ երեխաներն իմ թուլությունն են, իսկ փեսայիս կամ ապագա հարսիս համարում եւ համարելու եմ իմ նոր երեխաները ու նրանք նույն սիրուն են արժանանալու: Նրանցով իմ գանձարանն ավելանում է:

Որքանո՞վ եք միջամտում ձեր երեխաների անձնական կյանքին, օրինակ` նրանց մասնագիտության, կյանքի ընկեր ընտրելու հարցերում:

Երբեք նրանց չեմ պարտադրել իմ կարծիքը կամ ցանկությունը, բայց նաեւ երբեք չեմ դադարել որպես մայր խորհուրդներ տալ ու ճիշտ ճանապարհը ցույց տալ:

Կնոջ զանազան զենքերից  որոնք եք հաճախակի կիրառում` գեղեցկություն, արցունքներ եւ այլն:

Գեղեցկությունը կիրառման կարճ ճանապարհ է, իսկ արցունքներն էլ ինձ չեն հարցնում, երբ կարոտած եմ, երբ հուզված եմ, երբ ինչ որ բանի համար ցավում եմ:

Ձեր կյանքի ամենառոմանտիկ հիշողությունը:

Ամենառոմանտիկ հիշողությունս  բնականաբար կապված է իմ ամուսնության հետ եւ այն երկար ժամանակահատվածի հետ, երբ ամուսինս ինձ ամեն կիրակի ծաղիկներ էր նվիրում:

Ինչպիսի՞ն է Հեղինե Բիշարյանը խոհանոցում, ինչ  չե՞ք կարողանում պատրաստել եւ ի՞նչ եք լավ պատրաստում:

Սիրում եմ խոհանոցը եւ այնտեղ ինձ շատ լավ եմ զգում:Ես ինչ պատրաստում եմ, լավ եմ պատրաստում, որովհետեւ սիրով եմ պատրաստում, իսկ չկարողանալու մասին չեմ մտածում, որովհետեւ խոհանոցը կարողանում եմ թագավորել:

Ասում են` երջանիկ կյանք չի լինում, լինում են երջանիկ օրեր: Ձեր կյանքի երջանիկ օրերը:

Դրանք այն օրերն են երբ լույս աշխարհ եկան իմ երեխաները եւ նրանց հետ կապված ամեն մի հաջողություն սկսած նրանց առաջին քայլից, առաջին բառից եւ այդպես շարունակ մինչեւ այսօր: Իսկ ինչ վերաբերում է կյանքում երջանիկ լինելուն, ապա Պուբլիլիոս Սիրոսն ասում էր. «նա չէ երջանիկ, ով այդպիսին է թվում ինչ- որ մեկին,  այլ նա, ով իրեն զգում է այդպիսին»:

Եթե իմանայիք կամ եթե իմանային...

Եթե իմանաիք թե Ձեզ որքան եմ կարոտել իմ սիրելի ծնողներ եւ եթե իմանային, թե նրանց կարիքը  ես որքան ունեմ:

Երկնքից երեք խնձոր է ընկնում...

Մեկը, հարցեր պատրաստողին, մեկը հարցերին պատասխանողին, մեկն էլ հարցազրույցը կարդացողին:

Մեր շարքին մասնակցող նախորդ պատգամավորը` ՀՀԿ խմբակցությունից Տաճատ Վարդապետյանը ձեզ հարցնում է, թե ինչպես եք ծառայում ժողովրդին որպես ԱԺ պատգամավոր եւ արդյոք տեսնում եք ձեր աշխատանքում թերություններ:

Ընդհանրապես ցանկացած աշխատանքում կարող են թերություններ լինել, սակայն իմ աշխատանքում ես միշտ ձգտում եմ, որ դրանք հնարավորինս քիչ լինեն կամ ընդհանրապես չլինեն: Թե ինչպես եմ ծառայում ժողովրդին, պետք է ժողովուրդը գնահատական տա, համենայնդեպս արդեն երրորդ անգամ եմ ընտրվում Ազդային ժողովի պատգամավոր եւ պատգամավորի մանդատը ինձ համար միջոց ու պատասխանատվություն է բարեխղճորեն ծառայելու ազգիս ու հայրենիքիս:

Այժմ ձեր հարցը մեր շարքին մասնակցող մյուս պատգամավորին:

Ի՞նչ դեր եւ նշանակություն ունի հավատը Ձեր կյանքում:

Նշենք, որ Հեղինե Բիշարյանը Աժ-ում հնաբնակներից է: Աշխատել է  Երեւանի էլեկտրաապարատների գործարանում որպես վարպետ, ուսուցիչ, մանկավարժ եւ այլն: Ավարտել է Կիրովականի պետական մանկավարժական ինստիտուտը եւ ստացել  հայոց լեզվի եւ գրականության ուսուցչի որակավորում, մանկավարժական գիտությունների թեկնածու:է: Ամուսնացած է, ունի երկու երեխա: 

Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե Հովհաննիսյանի, Լեւոն Մարտիրոսյանի, Նաիրա Կարապետյանի, Հայկ Գրիգորյանի, Մարգարիտ Եսայանի, Գարեգին Նուշիկյանի, Հովհաննես Սահակյանի, Արտակ Զաքարյանի, Կարինե Աճեմյանի, Արտակ Դավթյանի, Սամվել Ֆարմանյանի, Շիրակ Թորոսյանի, Կարեն Ավագյանի, Էդուարդ Շարմազանովի, Տաճատ Վարդապետյանի, ԲՀԿ խմբակցության պատգամավոր Տիգրան Ուրիխանյանի, Էլինար Վարդանյանի , Վահե Էնֆիաջյանի ,  Նաիրա Զոհրաբյանի, ՀԱԿ-ից Լյուդմիլա Սարգսյանի, Հրանտ Բագրատյանի, Գագիկ Ջհանգիրյանի «Ժառանգությունից»` Ռուբեն Հակոբյանի, Խաչատուր Քոքոբելյանի, Ալեքսանդր Արզումանյանի, ՀՅԴ-ից` Արծվիկ Մինասյանիհետ, Աղվան Վարդանյանի, անկախ պատգամավոր Էդմոն Մարուքյանի հետ:

Շարքը` Ինգա Մարտինյանի