«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք Ազգային ժողովի Հանրապետական խմբակցության պատգամավոր, ԱԺ նախկին նախագահ Սամվել Նիկոյանի հետ:

Կանգնեք հայելու առջեւ եւ նկարագրեք ձեզ:

Տարիներն անցնում են:

Այժմ անցնենք ձեր էության բնութագրմանը: Ինչպիսի՞ մարդ եք:

Հայ եմ:

Թվարկեք ձեր ամենալավ եւ վատ հատկանիշները:

Անհատի օբյեկտիվ գնահատականը կարող է տալ միայն հասարակությունը:

Ձեր բնավորության ո՞ր հատկանիշների շնորհիվ եք շահել եւ որո՞նց պատճառով եք տուժել

 Բնավորությամբ դիվանագետ չեմ: Հետեւությունները թողում եմ ձեզ:

Ձեր հաջողության գաղտնիքը ո՞րն է: Օրինակ` հնարավոր է ինչ-որ թալիսմաններ եք պահում նախնիններից մնացած:

Օբյեկտիվ  իրողությունների ճիշտ ընկալումը:

Կարգախո՞ս ունեք:

Ապրի՛ր քո տեսակի մեջ:

Ինչպիսի՞ն էր մանուկ ժամանակ Սամվել Նիկոյանը, ի՞նչ չարաճճիություններ էիք անում: Իսկ դպրոցական եւ ուսանողական տարիներին «ռազբոյնիկ» եղե՞լ եք, թե՞ ոչ, աղջկա համար մղվող կռիվներին մասնակցե՞լ եք, կհիշեք մեկ դրվագ:

Չարաճճիություն ինչքան ասեք, կռվարար չեմ եղել, բայց աղջկա համար, իհարկե, կռվել եմ :

Մանկության ժամանակ ի՞նչ էիք երազում դառնալ եւ ի՞նչ եք դարձել: 

Երազում էի դառնալ ավիոկոնստրուկտոր, դեռ երազում եմ...

Դուք ձեզնից գո՞հ եք եւ եղե՞լ է իրավիճակ, երբ ամաչել եք ձեր արածի կամ ասածի համար:

Դժգոհ չեմ,բարեբախտաբար ամաչելու առիթ ինքս ինձ չեմ տվել:

Եթե նորից ծնվեիք, ինչպե՞ս կապրեիք:

Այնպես,ինչպես շարունակում եմ ապրել:

Պաշտոնները ձեր կյանքում ի՞նչ են փոխում, օրինակ` ասում էին, թե ԱԺ նախագահ դառնալուց հետո մեծամտացել էիք, հի՞մք ունեն այս խոսակցությունները:

Փոխվում են տվյալ պահի իմ զբաղվածության եւ պատասխանատվության չափը: Ինչ վերաբերվում է Ձեր ասած խոսակցություններին: Եթե նման կարծիք արտահայտող եղել է,ապա հավանաբար նա չի արժանացել իմ կողմից լուրջ վերաբերմունքի,իսկ ես անլուրջ մարդկանց երբեք լուրջ չեմ վերաբերվում:                              

Ձեր ամենամեծ հաղթանակը եւ պարտությունը: Կարելի՞ է առաջինը համարել ԱԺ նախագահ նշանակվելը, իսկ երկրորդը` նախարար նշանակվելու մասին խոսակցություններից հետո շարքային պատգամավոր լինելը:

Ծիծաղելի է ԱԺ նախագահ ընտրվելը  համարել հաղթանակ, իսկ անհայտ ծագմամբ խոսակցությունների չիրականանալը՝ պարտություն:

Ամենաշատը ո՞ւմ եք սիրում այս կյանքում ձեզնից առաջ կամ ձեզնից հետո:

Հայրենիքս, ընտանիքս:

Ունե՞ք «ատելի» մարդիկ, հակառակորդներ, թշնամիներ, ինչպե՞ս եք նրանց դիմագրավում:

Ատելի մարդիկ եւ թշնամիներ չունեմ:

Հիշաչա՞ր եք, թե՞ ոչ:

Չար մարդկանց չեմ մոռանում, իսկ բարի մարդկանց սխալները չեմ հիշում:

Ի՞նչ չեք ներում ձեզ կամ ձեր մեղքերը:

Ադես(տատիկս) ուներ մի կիսամաշ գործվածք, որը ես անփութորեն այրեցի, ինչը պատճառ դարձավ Ադեիս խիստ հուզվելու եւ արտասվելու, տարիներ հետո իմացա,որ այդ գործվածքի հետ կապված Ադես ուներ շատ մեծ հուշեր: Այդ մեղքը մինչ օրս ուղեկցում է ինձ:

Ովքե՞ր են ձեզ հիասթափեցրել, խաբել:

Ավելի շատ ինձ նվիրվել են եւ աջակցել:

Ի՞նչը կարող է ձեզ հուսահատեցնել:

Հույսը վերջինն է մահանում:

Ուրախությունը եւ տխրությունը ինչպե՞ս են դրսեւորվում:

Անմիջապես արտահայտվում է իմ դեմքին:

Ձեր երջանկությունը գո՞ւյն ունի:

Այո, այն եռագույն է:

Ի՞նչը կարող է ձեզ նյարդայնացնել, հունից հանել:

 Ագրեսիվ տգիտությունը եւ ցինիզմը:

Ձեր կյանքի ամենահամարձակ քայլը:

Անչափահաս տարիքում միայնակ տեղափոխվել մայրաքաղաք եւ նոր կյանք սկսել:

Ձեր մասին ամենանհեթեթ բամբասանքը:

Վերջերս մամուլում  հայտնված այն լուրը,  որ, իբր «ես վախեցել եմ ինչ որ ընդդիմադիր գործիչի հետ հաղորդմանը մասնակցելուց, եւ փախել եմ»:

Ամենամեծ սուտը, որ ասել եք:

Մեծ սուտ երբեւէ չեմ ասել:

Մենախոսությունները ի՞նչ թեմաների շուրջ են եւ դրանք ավարտվո՞ւմ են «ինքնահաշտությամբ»:

Ես ձգտում եմ դրան, որովհետեւ ամեն  մի երեւույթի, գործողության արդյունքում ես ցանկանում եմ ստանալ դրական էմոցիաներ:

Ձեր սիրելի անեկդոտը կպատմե՞ք:

Շատ երկար է:

Համաշխարհային հայտնի կանանցից ո՞ւմ գեղեցկությամբ եք հիանում:

Իմ գեղեցկության չափանիշը հանդիսանում է հայուհին, սիրո եւ գեղեցկության Աստվածուհի Աստղիկի կերպարով:

Ձեր կյանքի կանայք...ինչպիսի՞ն են նրանք, ի՞նչն եք գնահատում եւ հավանում կնոջ մեջ եւ ի՞նչն է ձեզ նյարդայնացնում նրանց մեջ:

Թույլ տվեք կանանց մասին  խոսուն լռել:

Ինչպե՞ս հանդիպեցիք ձեր կնոջը եւ ինչպե՞ս գերեցիք նրա սիրտը:

Ուսանողներ էինք ապրում էինք միեւնույն հանրակացարանում...

Ձեր կյանքի ամենառոմանտիկ օրը:

Փորձում եմ կյանքիս բոլոր օրերը դարձնել ռոմանտիկ:

Ի՞նչ խենթություններ եք արել հանուն սիրելիի:

Խիստ ներքին խոհանոց է:

Ձեր ընտանիքի անդամները ինչի՞ համար են ձեզ նախատում:

Ծխելու, եթե իհարկե ինձ տեսնում են:

Կուզեի՞ք ձեր որդիները ձեզ նմանվեին, նրանց ի՞նչ հայրական խորհուրդներ, խրատներ եք տալիս:

Անկախ իմ ցանկությունից, իմ որդին շատ նման է ինձ: Իմ պահվածքից նա ստանում է իրեն անհրաժեշտ բոլոր խորհուրդներն ու խրատները:

Եթե ընտրության հնարավորություն ունենայիք, կընտրեիք խմի՞չք, կի՞ն, թե փո՞ղ եւ ինչո՞ւ:

Խմիչք, եթե այն սպիտակ գինի է:Կին, եթե նա իմ կինն է: Փող, եթե այն վաստակել եմ արդար քրտինքով:

Ո՞րն է ձեր ամենամեծ նյութական հարստությունը:

Իմ հայրական տունը:

Ի՞նչ կերակուրներ եք սիրում, ի՞նչ եք կարողանում պատրաստել:

Սիրում եմ ամառային տոլմա, եւ ցանկացած կերակուր որում կա սմբուկ, պղպեղ եւ լոլիկ, կարող եմ պատրաստել  ձվածեղ եւ խորոված:

Չասված խոսքեր եղե՞լ են Ձեր կյանքում…Ուզո՞ւմ եք հիմա` այս հարցազրույցի շրջանակներում, ինչ-որ մեկին մի բան ասել, խոստովանել կամ հայտարարել:

Կյանքը գեղեցիկ եւ հետաքրքիր է այնքանով, որքանով որ միշտ էլ մնում են չասված խոսքեր:

Լինում է, չի լինում...

Ինգա անունով մի աղջիկ է լինում, որին հաջողվում է բոլոր պատգամավորներից կորզել գաղտնի մտքերը եւ դարձնել հրապարակային

Ձեր կյանքի հեքիաթը...

Մանկությունս…

Նշենք, որ Սամվել Նիկոյանը մասնագիտւթյամբ ինժեներ-մեխանիկ է եւ երկար տարիներ աշխատել է մասնագիտությամբ, Արցախյան ազատամարտի տարիներին զբաղվել է զենք-զինամթերքի արտադրմամբ եւ առաքմամբ: ԱԺ պատգամավոր է դեռեւս 2003թ, ամուսնացած է, ունի  երեք զավակ:

Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե Հովհաննիսյանի, Լեւոն Մարտիրոսյանի, Նաիրա Կարապետյանի, Հայկ Գրիգորյանի, Մարգարիտ Եսայանի, Գարեգին Նուշիկյանի, Հովհաննես Սահակյանի, Արտակ Զաքարյանի, Կարինե Աճեմյանի, Արտակ Դավթյանի, Սամվել Ֆարմանյանի, Շիրակ Թորոսյանի, Հայկ Բաբուխանյանի, Սուքիաս Ավետիսյանի, Կարեն Ավագյանի, Էդուարդ Շարմազանովի, Տաճատ Վարդապետյանի, ՕԵԿ-ից`Հեղինե Բիշարյանի, Կարեն Բոթոյանի. ԲՀԿ-ից`Տիգրան Ուրիխանյանի, Էլինար Վարդանյանի, Վահե Էնֆիաջյանի, Նաիրա Զոհրաբյանի, Գուրգեն Արսենյանի, Վահան Բաբայանի, Արմեն Ավետիսյանի, ՀԱԿ-ից Լյուդմիլա Սարգսյանի, Հրանտ Բագրատյանի, Գագիկ Ջհանգիրյանի «Ժառանգությունից»` Ռուբեն Հակոբյանի, Խաչատուր Քոքոբելյանի, Ալեքսանդր Արզումանյանի, ՀՅԴ-ից` Արծվիկ Մինասյանի հետ, Աղվան Վարդանյանի, անկախ պատգամավոր Էդմոն Մարուքյանի հետ:

Շարքը` Ինգա Մարտինյանի