Թուրքական Taraf թերթին հաջողվել է երկար բանակցությունների արդյունքում WikiLeaks-ի հիմնադիր Ջուլիան Ասանջից Թուրքիայի վերաբերյալ 11 հազար գաղտնի փաստաթուղթ ստանալ:
Ինչպես տեղեկացնում է թուրքական Taraf-ը, Ասանջը հայտնել է, թե իրենք Թուրքիայում հզոր գործընկեր են փնտրել եւ ի վերջո գտել են։ «Taraf-ը կհրապարակի 24 հազար էջից բաղկացած 11 հազար գաղտնի փաստաթուղթ, որոնց մեջ ամենահինը 1994-ի վերաբերյալ է, սակայն հիմնական հատվածը ներառում է 2000-2010 թվականները։ Այդ փաստաթղթերը կհարապարակվեն մարտի 17-ից սկսված»-գրել է Taraf-ը։
Նշենք, որ ստամբուլահայ հայտնի լրագրողներ Մարկար Եսայանն ու Սեւան Նիշանյանը եւս թղթակցում են Taraf-ին։
Չնայած Taraf-ի ոչ մեծ տպաքանակին, այն համարվում է սկանդալային հրապարակումներով հայտնի պարբերական։