NEWS.am-ը մեջբերում է հատված Քեսթեր Էդդիի հոդվածից, որը հրապարակվել է «Emerging Markets» կայքում:
Միտքը, որ Բուդապեշտում ընդունված իրավական որոշումը կարող է տագնապալի մարտական հռետորաբանության հանգեցնել Եվրոպայից հեռու` Հարավային Կովկասի երկու երկրների միջեւ, նախքան օգոստոսի 31-ը բավական անհավատալի էր թվում: Այդ օրը Հունգարիան ադրբեջանցի սպային հանձնեց Ադրբեջանի իշխանություններին, ինչը զայրույթ հարուցեց եւ տեղիք տվեց հարեւան Հայաստանի հետ պատերազմ սկսելու մասին խոսակցությունների:
Սպա Ռամիլ Սահիբ Սաֆարովը ցմահ ազատազրկման էր դատապարտվել 2004 թվականին Բուդապեշտում ՆԱՏՕ-ի դասընթացների ընթացքում հայ սպային կացնահարելու համար:
Հայաստանն անմիջապես դադարեցրեց դիվանագիտական հարաբերությունները Բուդապեշտի հետ եւ Ադրբեջանին, որի հետ ԽՍՀՄ-ի փլուզումից հետո տարածքային վեճ ունի Լեռնային Ղարաբաղի շուրջ, նախազգուշացրեց, որ «մենք պատերազմ չենք ուզում, սակայն եթե ստիպված լինենք, կպայքարենք եւ կհաղթենք»:
Հունգարիայում այդ գործը լուրջ հարված է թվում Վիկտոր Օրբանի` հունգարացի ագրեսիվ վարչապետի համար, որը Սաֆարովի արտահանձնելու որոշումը կայացնելիս անտեսել էր արտգործնախարարի եւ արդարադատության նախարարի խորհուրդը:
Այդ որոշումը անհանգստացրել է ԱՄՆ-ին, ԵՄ-ին եւ Ռուսաստանին, որոնցից յուրաքանչյուրն էլ փորձում է խուսափել Կովկասում նոր թեժացումներից:
Այդ որոշումը կարող է դիտվել որպես լուրջ սխալ Բուդապեշտի կողմից: Օրբանի համատեքստում այն ավելի մտահոգիչ է նրա՝ որպես առաջնորդի հանդեպ վստահության կորստի տեսանկյունից: Քննադատներն ասում են, որ նա վտանգում է ժողովրդավարությունը եւ վնասում ինչպես տնտեսությանը, այնպես էլ ներդրողների վստահությանը:
