Իշխանությունները Ադրբեջանից գազ գնելու հնարավորությունը բացատրում են Հայաստանի էներգետիկ անվտանգության դիվերսիֆիկացման նկատառումներով, ինչը բացարձակ մերկապարանոց է: Այս մասին NEWS.am-ի հետ զրույցում նշեց էներգետիկ անվտանգության փորձագետ Վահե Դավթյանը:
Նա նկատեց, որ Հայաստանի էներգետիկ համակարգը եւ մասնավորապես գազատրանսպորտային համակարգը, գազամատակարարումը առավել քան դիվերսիֆիկցված է. «Լինելով բավականին փոքր շուկա, որ տրեկան սպառում է լավագույն դեպքում մինչեւ 2,5 մլրդ խմ գազ, հայաստան մուտք է գործում երկու գազամուղ՝ հյուսիսայինը եւ Իրան-Հայաստան գազամուղը: Միայն Իրան Հայաստան գազամուղով տարեկան հնարավոր է ներկրել մինչեւ 2,3 մլրդ խմ գազ: Այսինքնմոտավորապես այն ծավալը, որ տարեկան սպառվում է ՀՀ-ում: Ուստի սա որեւէ աղերս չունի դիվերսիֆիկացման հետ, սա ավելի շատ մեր էներգետիկ համակարգի ադրբեջանականացում է»,-ասաց նա:
Անդրադառնալով նրան, թե տեխնիկապես ինչպես պետք է ադրբեջանական գազը մտնի Հայաստան, փորձագետն ասաց. «Կա երկու ուղի, առաջինը Վրաստանի տարածքով, ինչպես դա եղավ 2021-ի մարտին, երբ Հյուսիսային գազամուղի շինարարության աշխատանքների պատճառով գազի մատակարարումը ՌԴ-ից դադարեցված էր եւ մոտ 2 շաբաթ մենք Ադրբեջանից Վրաստանի տարածքով բնական գազ էինք ներկրում: Խոսքը 150 մլն խմ գազի մասին է: Երկրորդը նոր ենթակառուցվածքների ձեւավորումն է. մասնավորապես, խոսքը կարող է լինել Ղազախ-Երեւան դեռեւս ԽՍՀՄ օրոք գործող գազամուղի մասին: Դրա վերագործարկման, փաստացի զրոյից կառուցման համար Հայաստանը չունի որեւէ իրական ֆինանսական եւ նյութական միջոցներ: Ադրբեջանն էլ չի կարող նման նպատակադրում ունենալ՝ հաշվի առնելով, որ Հայաստանի փակուղային է, այն չի կարող հանդես գալ որպես տարանցման գոտի ադրբեջանական գազի վերարտահանման համար: Հետեւաբար, նպատակահարմար չէ նման մեծ ներդրումներ իրականացնել: Մնում է վրացական տարբերակը»: