Թուրքական իշխանությունները հերթական բլեֆն արեցին` նախապես հայտարարելով, թե խորհրդարանական ընտրություններում կառաջադրեն նաեւ հայազգի թեկնածուների, սակայն դրժեցին իրենց խոստումը: Այս մասին NEWS.am-ի թղթակցի հետ զրույցում հայտարարեց թուրքագետ Անդրանիկ Իսպիրյանը: Նա նշեց, որ նախապես նման խոստումներ էին տվել ե’ւ Թուրքիայի վարչապետ Էրդողանի ղեկավարած «Արդարություն եւ զարգացում» կուսակցությունը, ե’ւ թիվ մեկ ընդդիմադիր` «Ժողովրդա-հանրապետական» կուսակցությունը, ե’ւ «Գորշ գայլերի» քաղաքական թեւ հանդիսացող «Ազգայնական շարժում» կուսակցությունը ե’ւ հայերի նկատմամբ առավելագույնս հանդուրժողական վերաբերմունք ունեցող քրդական «Խաղաղություն եւ ժողովրդավարություն» կուսակցությունը:
Ըստ Իսպիրյանի`քրդական, իշխանամետ եւ ընդդիմադիր կուսակցությունների կողմից թեկնածուներ չառաջադրելու մեջ որոշակի տարբերություններ կան: «Իշխանությունների դեպքում դա շատ պարզ է. նրանք ցանկանում էին ապրիլի 24-ից առաջ մեղմել Ցեղասպանության հետ կապված ակտիվությունը, հայտարարելով, թե 50 տարի հետո առաջին անգամ հայազգի պատգամավորներ կլինեն խորհրդարանում, սակայն պարզվեց, որ դա բլեֆ էր»,-նկատեց փորձագետը: Նրա խոսքով` Թուրքիան այսպիսով ցույց տվեց, որ նախկինի պես անհանդուրժող է հայերի նկատմամբ, այլապես ձեւի համար գոնե մեկ հայազգի թեկնածու կառաջադրեր խորհրդարանական ընտրություններում:
Ի հակադրություն այդ ամենի, ըստ թուրքագետի, Էրդողանի կուսակցությունը Անկարայի 2-րդ ընտրատարածքից թեկնածու առաջադրեց Հայոց Ցեղասպանության հերքման մասին գիրք գրած պատմաբանին` Սեյիթ Սերթչելիքին, ով հայերեն իմացող միակ թուրք պատմաբանն է: «Տվյալ անձը պետք է խորհրդարան մտնի, որպեսզի ավելի բարձր ամբիոնից քարոզի թուրքական մերժողականությունը Հայոց ցեղասպանության հարցում»,-նկատեց Իսպիրյանը:
Նա նաեւ ուշադրություն հրավիրեց այն փաստի վրա, որ Ժողովրդա-հանրապետական կուսակցության առաջնորդ Քեմալ Քըլըչդարօղլուն, ով ծնունդով Դերսիմից է, եւ նրա մայրն, ըստ թուրքական մամուլի, ունի հայկական արմատներ, պատգամավորության ցուցակից դուրս է թողել երդվյալ հակահայ պատգամավորներին: Այդ թվում` Ջանան Առըթմանին, ով հայտնի դարձավ Թուրքիայի նախագահ Գյուլի հայկական արմատների մասին իր հայտարարություններով:
Մյուս հակահայ պատգամավորը Օնուր Օյմենն է, ով «Ժողովրդա-հանարպետական» կուսակցության փոխնախագահն էր, ում Քըլըչդարօղլուն ոչ միայն դուրս թողեց կուսակցության կառավարող խորհրդից, այլ նաեւ պատգամավորության թեկնածուների ցուցակից: Օյմենն այն պատգամավորն է, ում Դերսիմում համարում են ֆաշիստ, քանի որ քրդական հարցի լուծման համար օրինակ էր բերել 1937-ի Դերսիմի կոտորածները։
Նշենք, որ Hurriyet Daily News-ը մոտ երկու ամիս առաջ հայտնել էր, թե 2011-ի խորհրդարանական ընտրություններին կմասնակցի 7 հայ թեկնածու, որոնցից 6-ը կներկայացնեն քաղաքական կուսակցություններ, իսկ 1-ը կլինի անկախ թեկնածու։ Իշխող «Արդարություն եւ զարգացում» կուսակցությունը մտադիր է առաջադրել Մելքոն Քարաքյոշեի, Թաթոս Բեբեքի, Մարկար Եսայանի, Ջերրի Խրիմյանի եւ Պետրոս Շիրինօղլուի թեկնածությունները: Ընդդիմադիր «Ազգայնական շարժում» («Գորշ գայլերի» քաղաքական թեւը) կուսակցությունը նախատեսում է առաջադրել Գեղամ Կարապետյանի թեկնածությունը։ Իսկ ընդդիմադիր «Ժողովրդա-հանրապետական» կուսակցության կողմից առաջադրվելու է հայազգի Արեւ Ջեբեջին: Նա նշել է, որ պատգամավոր դառնալու դեպքում ներկայացնելու է Թուրքիայի շահերը, սակայն առաջին տեղում է լինելու տեղի հայ համայնքի խնդիրները։
Հիշեցնենք, որ Թուրքիայում խորհրդարանական ընտրությունները տեղի են ունենալու 2011 թվականի հունիսի 12-ին: