Հայաստանի երիտասարդական կազմակերպությունների ներկայացուցիչները, որոնք բողոքի ակցիա էին իրականացնում Հայաստանում Ռուսաստանի դեսպանատան առջեւ` ի նշան բողոքի Թուրքիայի վարչապետ Ռեջեփ Թայիփ Էրդողանի ռուսաստանյան այցելության, իրենց հայտարարությունը զետեղել են դագաղի մեջ, որի վրա գրել են «Ռուսաստանի Դաշնության դեսպանատան փոստարկղ` ռուս-թուրքական պայմանագրի համար» եւ թողել այն դեսպանատան առջեւ:
Երբ ակցիայի մասնակիցները հեռացան, ոստիկանության աշխատակիցները վերցրին դագաղն ու դրեցին «Արդշինինվեստբանկի» պատերի տակ:
Նշենք, որ այսօր երիտասարդ ակտիվիստները բողոքի ակցիա էին անում` նկատելով, որ Էրդողանի այցի հենց այդ ժամկետին համաձայնելով, Ռուսաստանի իշխանությունները դավաճանել են իրենց ռազմավարական գործընկեր Հայաստանի ազգային զգացմունքները: Ցուցարարները «Էրդողան=Աթաթուրք, Մեդվեդեւը` Լենի՞ն» եւ այլ գրառումներով պաստառներ էին տանում: Նրանք նաեւ «ամոթ» են վանկարկել:
Հիշեցնենք, որ 1921 թվականի մարտի 16-ին կնքված Մոսկվայի պայմանագրով քեմալական Թուրքիան եւ բոլշեւիկյան Ռուսաստանը փաստացի կիսեցին Հայաստանի Հանրապետության տարածքը. Թուրքիան ստացավ 1877-78 թվականներին կորցրած Կարսի մարզի տարածքը եւ Բաթումի մարզի հարավային մասը, իսկ Բաթումի մարզի հյուսիսային մասի փոխարեն բոլշեւիկները թուրքերին փոխանցեցին Սուրմալուի գավառը: 1921 թվականի հոկտեմբերի 13-ին ստորագրվեց Կարսի պայմանագիրը, որով հաստատվեցին Մոսկվայի պայմանագրի դրույթները Հայաստանի, Վրաստանի եւ Ադրբեջանի ներկայացուցիչների կողմից:
