![](img/news/82/23/75/default.jpg)
Իրանն իր գոյությանը վտանգ սպառնալու դեպքում ստիպված կլինի փոխել իր միջուկային դոկտրինը, դրա մասին Al Jazeera-ին տված հարցազրույցում հայտարարել է Իրանի հոգեւոր առաջնորդի խորհրդական Քամալ Խարազին։
«Մենք միջուկային ռումբ ստեղծելու որոշում չունենք, բայց եթե Իրանի գոյությանը վտանգ սպառնա, այլ ելք, քան մեր ռազմական դոկտրինը փոխելը, չի մնա», - հայտարարել է Խարազին: Իրանի հոգեւոր առաջնորդի խորհրդականը հավելել է, որ եթե սիոնիստական ռեժիմը հարձակվի Իրանի միջուկային օբյեկտների վրա, երկրի զսպման համակարգը կփոխվի:
Խարազին պատասխանել է նաև Գազայի պատերազմին վերաբերող հարցերին և հայտարարել, որ Իսրայելը կշարունակի ագրեսիան՝ առանց սպասելու ՀԱՄԱՍ-ի դիմադրության շարժման համաձայնությանը։
«ՀԱՄԱՍ-ը ցանկանում էր բարի կամք դրսևորել, բայց դուք ականատես եղաք, որ իսրայելական ռեժիմը, ի պատասխան ՀԱՄԱՍ-ի բարի կամքի, որոշեց ուժ կիրառել»,- նշել է Խարազին՝ անդրադառնալով Կատարի և Եգիպտոսի հրադադարի առաջարկի վերաբերյալ ՀԱՄԱՍ-ի համաձայնության թեմային: