Ֆինլանդիան միակ երկիրն է ՆԱՏՕ արեւելյան սահմանին, որտեղ դաշինքի այլ երկրների զորքեր մշտական հիմքով տեղակայված չեն, եւ Հելսինկին դիտարկում է տարբեր սցենարներ, ներառյալ մշտական զորակազմի տեղակայումը։ Այս մասին Yle-ին տեղեկացրել է պաշտպանության ուժերի հրամանատար Յաննե Յաակոլան։
«Մենք առայժմ այս մասին որոշում չունենք, բայց դիտարկում ենք տարբերակներ՝ զորավարժությունների ընդլայնում, ռոտացիայի մոդել կամ գործունեության որեւէ այլ տեսակ»,- ասել է Յաակոլան։
Նա նշել է, որ Ֆինլանդիան բավական ուժեղ սեփական զինված ուժեր ունի եւ որ հիմա երկիրը զորքերի սուր անրաժեշտություն չունի։ Սակայն նման հնարավորությունը չի բացառվում։ «Իհարկե, հնարավոր ճգնաժամային իրավիճակում մեզ աջակցություն պետք կլինի, եւ մենք ցանկանում ենք ստանալ այն»,- ասել է նա։
Զորքերի հասնելու կամ մեկ այլ օգնության արագությունը, նրա խոսքով, կախված է քաղաքական որոշումներից։ «Անհնար է կոնկրետ ժամկետներ նշել։ Պետք է այսուհետ եւս պահպանել սեփական ուժերով պաշտպանություն սկսելու ունակությունը եւ դաշնակիցների օգնության վրա հույսը դնել ավելի ուշ փուլի համար»,- կարծում է հրամանատարը։