Իսպանիայի Գերագույն դատարանը որոշել է դադարեցնել Telegram հարթակի ծառայությունները երկրում՝ մեդիա ընկերությունների այն բողոքներից հետո, որ այն թույլ է տալիս օգտատերերին վերբեռնել իր կոնտենտն առանց թույլտվության։ Այս մասին Reuters-ին հայտնել է դատարանի աղբյուրը։

Գործակալության տվյալներով, երկուշաբթի օրվանից Telegram-ի օգտագործումն Իսպանիայում ժամանակավորապես կդադարեցվի մեդիա ընկերությունների, մասնավորապես՝ Atresmedia, EGEDA, Mediaset և Telefonica պահանջով։

Ինչպես նշում է Reuters-ը, դատավոր Սանտյագո Պեդրասը համաձայնել է դադարեցնել Telegram-ի ծառայություններն Իսպանիայում, քանի դեռ բողոքները հետաքննվում են։ Աղբյուրի համաձայն, բջջային կապի օպերատորներից պահանջվելու է արգելափակել Telegram-ի ծառայությունները։

Համաձայն CNMC հակամենաշնորհային գերատեսչության տվյալների, Telegram-ը չորրորդ ամենահայտնի մեսենջերն է Իսպանիայում: CNMC-ի կողմից հարցված իսպանացիների գրեթե 19%-ն օգտվում է դրանից: