Հնդկաստանը մտահոգված է Հայաստանի և Ադրբեջանի միջև հակամարտությամբ, ինչպես նաև Ադրբեջանի, Պակիստանի և Թուրքիայի միջև աճող մերձեցմամբ և այս ֆոնին 2023 թվականին Հնդկաստանը, Իրանը և Հայաստանը ստորագրեցին եռակողմ համաձայնագիր՝ ընդլայնելու «Հյուսիս-Հարավ միջազգային տրանսպորտային միջանցքի հաղորդակցությունը»։ Այս մասին գրում է հնդկական Bharat Shakti լրատվական հրատարակությունը։
Այն բանից հետո, երբ Հնդկաստանը և Հայաստանը երկար տարիներ համագործակցել են այնպիսի ոլորտներում, ինչպիսիք են մշակույթը, առևտուրը և պաշտպանությունը, Երեւանը վերջին շրջանում դարձել է հնդկական արտադրանքի, այդ թվում՝ պաշտպանական նշանակության ապրանքների խոշորագույն ներկրողներից մեկը։
2017-18 թվականների 33,91 միլիոնից 2021-22 թվականներին երկկողմ առևտուրն աճել է մինչև 162,32 միլիոն: Երկկողմ առևտուրն ու ներդրումները ձևավորվել են 2019 թվականին ստեղծված Հնդկաստան-Հայաստան Համատեղ Գործարար խորհրդի նախաձեռնությամբ։ Այն կարող է ընդլայնվել Եվրասիական տնտեսական միության (ԵԱՏՄ) և Հնդկաստանի միջև ազատ առևտրի համաձայնագրի միջոցով։
Հնդկաստանը և Հայաստանը կարևոր ռազմական համաձայնագրեր են կնքել, այդ թվում՝ Pinaka բազմափողանի հրթիռային կայանների և հակատանկային հրթիռների ներմուծման մասին: Հայաստանը կարող է ձեռք բերել նաև «Աքաշ» հակաօդային պաշտպանության համակարգը։
2022 թվականից ի վեր Հնդկաստանը մշտապես պաշտպանական մատակարարումներ է իրականացնում Հայաստանին։ 2020 թվականին Հայաստանը Հնդկաստանից ձեռք է բերել «SWATHI» զենքի տեղորոշման ռադիոտեղորոշիչ համակարգը։ 2022 թվականին համաձայնագիր է ստորագրվել հրթիռների և զինամթերքի արտահանման մասին։
2023 թվականի օգոստոսին Հայաստանը ստացավ հնդկական առաջադեմ քարշակային հրետանային համակարգերի (ATAGS) առաջին խմբաքանակը։