Ստամբուլում ինքնակամ ոստիկանություն է ներկայացել թուրք հայտնի նկարիչ Բեդրի Բայքամին եւ նրա ասիստենտին դանակահարած անձը։
Թուրքական Hurriyet-ի փոխանցմամբ՝ Ստամբուլի Բայրամփաշայի ոստիկանատուն է մտել Մեհմեդ Չելիքել անունով մի անձ եւ հայտնել, որ ինքն է դանակահարել Բեդրի Բայքամին։
Նշենք, որ Ստամբուլի «Աքաթլար» մշակույթային կենտրոնում կազմակերպվել էր հանդիպում, որի ընթացքում քննարկվել է Կարսի հայ-թուրքական բարեկամության հուշարձանի ապամոնտաժման դեմ ապրիլի 23-ին բողոքի երթ իրականացնելու հարցը։
Հանդիպման ժամանակ Բեդրի Բայքամը քննադատել է Թուրքիայի վարչապետ Ռեջեփ Թայիփ Էրդողանին՝ արվեստի գործը «հրեշավոր» անվանելու եւ այն քանդելու որոշման համար։
Մշակույթի կենտրոնից դուրս գալու ժամանակ անհայտ անձը մոտեցել եւ դանակահարել էր Բեդրի Բայքամին եւ նրա ասիստենտին։
Վիրավորված նկարիչը փողոցում րոպեներով օգնություն է կանչել, սակայն ոչ մի մեքենա չի փորձել օգնել արյունաթաթախ նկարչին։
Բայքամն ավելի ուշ կարողացել է մի տաքսիով հիվանդանոց հասնել։