Կինոռեժիսոր Մոհամմադ Ռասուլոֆը մայիսի 12-ին չբացահայտված վայրում հայտարարել է, որ գաղտնի լքել է Իրանը և մեկնել Եվրոպա։ Նրա հայտարարությունը հրապարակել է IndieWire-ը:
«Երկար ու դժվարին ճանապարհորդությունից հետո մի քանի օր առաջ ժամանեցի Եվրոպա»,- գրել է ռեժիսորը։
Նա նշել է, որ անմիջապես հեռացել է, երբ վերաքննիչ դատարանը հաստատել է իր ութ տարվա ազատազրկման դատավճիռը:
«Ես քիչ ժամանակ ունեի որոշում ընդունելու համար: Պետք է ընտրություն կատարեի բանտի և Իրանից հեռանալու միջև։ Ծանր սրտով ընտրեցի աքսորը։ 2017 թվականի սեպտեմբերին Իսլամական Հանրապետությունը խլեց իմ անձնագիրը։ Ուստի ես ստիպված էի գաղտնի հեռանալ Իրանից»,- ասել է 52-ամյա Ռասուլոֆը:
Նա նշել է, որ իր վերջին՝ «Սրբազան թզի սերմը» ֆիլմի դերասաններից մի քանիսին հաջողվել է լքել երկիրը, սակայն բազմաթիվ արտիստներ շարունակում են մնալ Իրանում, և անվտանգության ծառայությունները հալածում են նրանց։ Ֆիլմի մասնակիցները հարցաքննվում են, նրանց նկատմամբ քրեական գործեր են հարուցվում, արգելվում է լքել երկիրը։
«Նրանք ներխուժել են օպերատորի աշխատասենյակ և խլել ամբողջ տեխնիկան։ Ֆիլմի ձայնային ռեժիսորին արգելել են մեկնել Կանադա։ Նկարահանող խմբի անդամների հարցաքննությունների ժամանակ անվտանգության ծառայությունները խնդրել են ճնշում գործադրել ինձ վրա, որպեսզի ես ֆիլմը հանեմ Կաննի կինոփառատոնից»,- ասել է Ռասուլոֆը։
Նա համաշխարհային կինոհանրությանը կոչ է արել «արդյունավետ աջակցություն» ցուցաբերելու նման ֆիլմերի ստեղծողներին և նշել, որ իր մտքերը բոլորի հետ են, ովքեր մասնակցել են «Սրբազան թզի սերմը» ֆիլմի ստեղծմանը և այժմ վտանգի տակ են։
Իսլամական հեղափոխական դատարանը, ինչպես հայտնի է դարձել մայիսի 8-ին, իրանցի ռեժիսոր Մոհամմադ Ռասուլոֆին դատապարտել է ութ տարվա ազատազրկման, ինչպես նաև՝ մտրակի հարվածների, տուգանքի և ունեցվածքի բռնագրավման։
Նրա փաստաբան Բաբակ Պաքնիան հայտնել է, որ դատավճռի հիմքում Ռասուլոֆի հրապարակային հայտարարություններն են, ինչպես նաև նրա ստեղծած գեղարվեստական և վավերագրական ֆիլմերը:
Իրանի իշխանությունները մեծացրել են Մոհամմադ Ռասուլոֆի վրա ճնշումը, երբ նրա վերջին ֆիլմը՝ «Սրբազան թզենի սերմը», ընտրվել է 2024 թվականի Կաննի կինոփառատոնի գլխավոր մրցութային ծրագրում։
Ֆիլմը Թեհրանի հեղափոխական դատարանի դատավորի մասին է, որը հետաքննում է համազգային ցույցերին վերաբերող գործերը: Ռասուլոֆի ֆիլմն առաջին անգամ է ընդգրկվել Կաննի մրցութային ծրագրում, մինչ այդ նրա ֆիլմերը ցուցադրվել են «Հատուկ հայացք» ծրագրով։