Իրանի իշխանությունները 15 ամսով երկարացրել են Նոբելյան մրցանակակիր եւ իրավապաշտպան Նարգես Մոհամադիի բանտարկության ժամկետը։ Այս մասին տեղեկացրել է The Washington Post-ը։
Կնոջ ընտանիքը սոցցանցերում տեղեկացրել է, որ նա մեղադրվում է «իսլամական հանրապետության դեմ քարոզչություն տարածելու» մեջ։
Մոհամադին աջակցել է բողոքներին Իրանում, որոնք տեղի են ունեցել 2022թ. բարքերի ոստիկանության կողմից 22-ամյա Մահսա Ամինիին ծեծի ենթարկելու ֆոնին, քանի որ աղջիկը հիջաբը ճիշտ չէր կրել։
WP տվյալներով՝ Ամինիի մահվան տարելիցի օրը Մոհամադին եւ այլ բանտարկյալ կանայք բողոքի ակցիա էին կազմակերպել Իրանի տխրահռչակ Էվին բանտում եւ այրել գլխաշորերը։
Մոհամադիի վերջին դատավճիռը հինգերորդն է 2021թ. մարտից ի վեր։ Իրավապաշտպանը բանտում պետք է անցկացնի 12 տարի երեք ամիս։ Նա կստանա նաեւ ճիպոտի 154 հարված եւ սոցիալական ու քաղաքական տարբեր արգելքներ, տեղեկացրել են նրա ընտանիքի անդամները։
Նա առաջին անգամ ձերբակալվել է 2011թ.։
2023թ. դեկտեմբերի 10-ին Նորվեգիայի մայրաքաղաք Օսլոյում Նարգես Մոհամադին արժանացել է խաղաղության Նոբելյան մրցանակի։ Քանի որ այդ պահին նա բանտում էր, մրցանակն ստացել են նրա երեխաները՝ 17-ամյա երկվորյակներ Ալի եւ Կիանա Ռահմանիները։
