Վրաստանի Պետական անվտանգության ծառայությունը հայտարարել է Ցխինվալիի շրջանի ուժայինների այս շաբաթ ձերբակալած Վրաստանի երեք քաղաքացիներին ազատ արձակելու մասին, հայտնում է «Նովոստի Գրուզիան»։
«Նրանք ազատ են արձակվել և գտնվում են Վրաստանի կենտրոնական իշխանությունների կողմից վերահսկվող տարածքում»,- ասվում է հայտարարության մեջ։
Թամազ Էցելաշվիլիին, Օթար Տերաշվիլիին և Վալերի Գիունաշվիլիին ռուսական ուժերը ձերբակալել էին ապրիլի 14-ին Գորիի շրջանի Զեմո Արցևի գյուղի մոտակայքում՝ բաժանարար գծի մոտ։
Լրատվամիջոցը հայտնում է, որ նրանք տեղի բնակիչներ են։ Ձերբակալվածներից մեկն անչափահաս է, մյուս երկուսը՝ 19 և 20 տարեկան են։
Ցխինվալիի ՊԱԿ-ը հայտարարել է, որ նրանք խախտել են «պետական սահմանը», իսկ ձերբակալությունից հինգ օր անց «պատժվել են տուգանքով և վարչական արտաքսմամբ»։
Ըստ Պետանվտանգության ծառայության, Վրաստանի քաղաքացիների ազատման գործընթացում ակտիվորեն օգտագործվել է Վրաստանում ԵՄ դիտորդական առաքելության (EUMM) անմիջական մասնակցությամբ գործող «թեժ գծի» մեխանիզմը և կենտրոնական իշխանությունների տրամադրության տակ գտնվող բոլոր մյուս գործիքները։
Թբիլիսին մշտապես տեղեկատվություն է տրամադրել միջազգային գործընկերներին կատարվածի մասին։
Նրանք հավելել են, որ միջազգային գործընկերների հետ միասին շարունակում են ակտիվորեն աշխատել ապօրինի ձերբակալված Վրաստանի բոլոր քաղաքացիների ազատ արձակելու համար։
Ներկայումս Վրաստանի հինգ քաղաքացի շարունակում է մնալ Ցխինվալիի շրջանի բանտում և մեկուսարանում։