Ուզում եմ ձեր ուշադրությունը հրավիրել այն փաստի վրա, որ մենք չենք օգտագործում «Զանգեզուրի միջանցք» տերմինը։ Այս մասին այսօր՝ մարտի 27-ին, ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Խոսքը Հայաստանի Սյունիքի մարզի տարածքով Ադրբեջանի արևմտյան շրջանները Նախիջևանի հետ կապող երթուղու մասին է։ Գոյություն ունի փոխզիջումների զարգացման լավ կայացած մեխանիզմ։ Սա Ռուսաստանի, Ադրբեջանի և Հայաստանի փոխվարչապետների եռակողմ աշխատանքային խումբ է։ 2023 թվականի հունիսի 2-ին կայացած վերջին հանդիպման ժամանակ կողմերը մոտ էին տարածաշրջանում տրանսպորտային և տնտեսական երթուղիների ապաշրջափակման համապարփակ փոխշահավետ որոշման ընդունմանը։ Եվ մենք մեր գործընկերներին կոչ ենք անում դրսևորել քաղաքական կամք և վերսկսել փոխգործակցությունը ստեղծված եռակողմ ձևաչափերի, այդ թվում՝ եռակողմ աշխատանքային խմբի միջև»,- նշել է ՌԴ ԱԳՆ պաշտոնական ներկայացուցիչը։
Պատասխանելով Հայաստանի և Ադրբեջանի միջև լարվածության սրման և Բաքվի կողմից «ուժային գործողության» հավանականության մասին հարցին՝ Մարիա Զախարովան ընդգծել է, որ ռուսական կողմի դիրքորոշումը հայտնի է և հետևողական։
«Մենք կողմերին կոչ ենք անում առավելագույն զսպվածություն ցուցաբերել այս թեմայով և խուսափել ագրեսիվ հռետորաբանությունից։ Իսկ բոլոր տարածքային վեճերն ու փոխադարձ պահանջները պետք է լուծվեն բացառապես քաղաքական-դիվանագիտական ճանապարհով և միայն քաղաքական-դիվանագիտական մեթոդներով։ Նման հարցերը, այդ թվում՝ անկլավների վերադարձն ու փոխանակումը, պետք է լուծվեն հայ-ադրբեջանական սահմանի սահմանազատման երկկողմ հանձնաժողովի շրջանակներում։
Մենք մեր կողմից պատրաստ ենք առավելագույն աջակցություն ցուցաբերել այդ գործին՝ հաշվի առնելով Ռուսաստանին հասանելիք եզակի քարտեզագրական նյութերն ու փորձաքննությունը։ Համանման սկզբունքները կիրառելի են Հայաստանի և Ադրբեջանի միջև տրանսպորտային հաղորդակցությունների ապաշրջափակման դեպքում»,- ասել է նա։
