Ջավախքում՝ Թուրքիային եւ Հայաստանին սահմանակից տարածքում նախատեսվում է կառուցել «Ազգային պարկ»: Այդ խնդիրն է քննարկվել Սամցխե-Ջավախքի վարչակազմում կայացած հանդիպման ժամանակ, որին մասնակցել են կանաչ տարածքների պաշտպանության գործակալության ղեկավար Գիորգի Շոնվաձեն, ինչպես նաեւ Նինոծմինդայի եւ Ախալքալաքի հասարակության ներկայացուցիչները:
Հանդիպման գլխավոր նպատակը Ջավախքի բնակչության սոցիալ-տնտեսական վիճակի բարելավման նպատակով սոցիալական ծրագրերի ընտրությունն է եղել, գրում է վրացական «Սամխրեթիս Կարիբջե» պարբերականը:
Կանաչ տարածքների պաշտպանության գործակալության ղեկավարի խոսքով, Ջավախքի ազգային այգու ծրագիրը կավարտվի 2011 թվականի երկրորդ կեսին:
«Ազգային այգու կառուցումը, որի տարածքը 15000 հա է, կսկսվի մի քանի ամսում: Այստեղ հիանալի բնություն է, բազմազան ու բազմերանգ, ինչը պետք է պաշտպանենք եւ զարգացնենք տուրիզմը»,-հայտարարել է նա:
Նա նաեւ ընդգծել է, որ այն տարածքը, որտեղ ծրագրավորված է կառուցել ազգային պարկը, սահմանակից է Թուրքիային եւ Հայաստանին, եւ իր մեջ ներառում է մի քանի լճեր:
Ըստ ծրագրի, Ջավախքի Ազգային պարկի կառուցման շրջանակներում, միայն 400 հազար եվրո կծախսվի տեղի բնակչության համար: