«Մխիթար Սեբաստացի» կրթահամալիրում հունվարի 21-ին տեղի է ունեցել Live Meeting, որի շրջանակներում նորարար մի խումբ դպրոցներ պետք է միմյանց հետ կենդանի կապ հաստատեին՝ Microsoft-ի Live Meeting ծրագրի միջոցով, սակայն Live Meeting-ի ժամանակ միմյանց հետ կապ են հաստատել միայն «Մխիթար Սեբաստացի» կրթահամալիրի 6 մասնաճյուղերը:
Live Meeting-ի պատասխանատու, «Մխիթար Սեբաստացի» կրթահամալիրի 11-րդ դասարանի աշակերտուհի Շուշան Սողոմոնյանը NEWS.am-Ինովացիայի թղթակցի հետ զրույցում ասաց, որ հրավեր ուղարկվել է աշխարհի բոլոր նորարար դպրոցներին, ու արտերկրյա դպրոցներից շատերը հայտագրվել էին մասնակցության համար։
Live Meeting-ի թեման էր «Կայքը՝ որպես ուսումնական տարածք»։ Կենդանի հանդիպումը տեղի է ունեցել անգլերենով։
Նշենք, որ սա առաջին հաջողված փորձն էր, նախկինում կրթահամալիրը եւս նման հանդիպումներ կազմակերպելու փորձ է կատարել, սակայն այն հաջողությամբ չի պսակվել՝ տեխնիակական խնդիրների պատճառով։
NEWS.am-ը փորձել է մյուս դպրոցներից պարզել, թե ինչու չեն մասնակցում Live Meeting-ին։ «Անանիա Շիրակացի» կրթահամալիրից պատասխանեցին, որ պաշտոնական հրավեր չեն ստացել։ Ըստ կրթահամալիրի տնօրեն Աշոտ Ալիխանյանի՝ հրավերը եղել է բանավոր, թեեւ իրենք միշտ ուրախ են համագործակցել «Մխիթար Սեբաստացի» կրթահամալիրի հետ։
Հիշեցնենք, որ «Անանանիա Շիրակացին» 2010 թ. ընդգրկվել է Microsoft-ի աշխարհի նորարար դպրոցների շարքում։