Քաղաքական վերլուծաբան Մատվեյ Գանապոլսկին համոզված է, որ առանց նավթի ու գազի էլ Հայաստանը կարող է առաջընթաց ունենալ: Այսպիսի կարծիք նա հայտնել է լրագրողների հետ զրույցում: «Ադրբեջանը շատ նավթ եւ գազ ունի, սակայն դա անսպառ չէ, եւ Ալիեւը, երբ մենակ է մնում ինքն իր հետ, մտածում է, որ շատ դժվար է Հայաստանի հետ անընդհատ թշնամական հարաբերությունների մեջ գտնվելը»,- ասել է նա:
Ինչ վերաբերում է Ռուսաստան-Ադրբեջան փոխհարաբերություններին, որտեղ նույն նավթի ու գազի գործոնն է դեր խաղում, տարածաշրջանային ռազմավարություն մշակելիս Ռուսաստանի առաջնահերթություններին ու այն փոխհարաբերություններին, որոնք նա ունի տարածաշրջանի մյուս երկրների հետ, ապա այս ամենն, ըստ Գանապոլսկիի, զուտ Ռուսաստանի ներքին գործն է.
«Վերջիվերջո, հայերի ի՞նչ գործն է, թե Ռուսաստանն ինչ շահեր ունի: Դուք երբեւէ լսե՞լ եք, որ Ռուսաստանը բարձրաձայնի Կովկասի հետ կապված իր ռազմավարությունը»,- ասում է Գանապոլսկին՝ ավելացնելով, որ եթե խոսք է գնում տարածաշրջանում խաղաղություն պահպանելու մասին, ապա Ռուսաստանի այս «կարգադրությանը» Հայաստանը հետեւում է:
Գանապոլսկին, սակայն, բարձրաձայնում է Ռուսաստանի մի ցանկության մասին. «Ռուասատանի ռազմավարական ցանկությունն է՝ ներկա գտնվել այս տարածաշրջանում: Սա կարեւոր է, քանի որ Ռուսաստանն այստեղ շահեր ունի, այստեղ պիտի ֆորպոստ լինի, բայց Ռուսաստանի այս ձգտումները որեւէ կերպ չեն խանգարում Հայաստանին ՝ վարել անկախ քաղաքականություն: Ես որեւէ տեղ չեմ կարդացել, որ Մեդվեդեւն այսպիսի արտահայտություն թույլ տա՝ «Մենք արգելում ենք Հայաստանին՝ հաշտվել Ադրբեջանի հետ, չլուծել ղարաբաղյան հիմնախնդիրը, իսկ Թուրքիայի ուղղությամբ թքել: Ես չեմ կարդացել այդպիսի բան: Ռուսաստանն իր շահերն ունի, բայց Ռուսաստանը հիմա զբաղված է Լուժկովի դեմ պայքարելով»:
