Սանկտ Պետերբուրգի Սմոլնինսկի շրջանային դատարանը Նիկոլայ Կոնաշենոկին 14 օրով ձերբակալել է մանր խուլիգանության համար (ՌԴ Վարչական իրավախախտումների վերաբերյալ օրենսգրքի 20.1-րդ հոդվածի 1-ին մաս):
Ֆոնտանկայի փոխանցմամբ՝ տղամարդու նկատմամբ քրեական գործ է հարուցվել նաև ահաբեկչությունն արդարացնելու համար (ՌԴ Քրեական օրենսգիրք 205.2)՝ սոցցանցում Մոսկվայի մերձակայքում գտնվող «Կրոկուս սիթի հոլլ»-ում տեղի ունեցած ահաբեկչության մասին նրա գրառումների համար։
Սանկտ Պետերբուրգի դատարանների մամուլի ծառայության նախագահ Դարիա Լեբեդևայի հաղորդագրության համաձայն՝ Կոնաշենոկը մարտի 25-ին, ժամը 21:50-ին, բերման է ենթարկվել ոստիկանության բաժին։ Սրանից քիչ առաջ, ըստ Լեբեդևայի, Միտնինսկայա փողոցում նա «բղավել է, ձեռքերը թափահարել, կոպիտ, անպարկեշտ արտահայտություններ է օգտագործել», ինչը վախեցրել է անցորդներին։
Նախօրեին Նիկոլայ Կոնաշենոկը ձերբակալվել էր Պուլկովո օդանավակայանում։ Ինչպես գրել է Ֆոնտանկան, նա ցանկացել է Հայաստան թռչել Մոսկվայով։ Ավելի ուշ պարբերականը տեսանյութ է հրապարակել, որում տղամարդը ներողություն է խնդրում Մոսկվայի մարզում տեղի ունեցած ահաբեկչության մասին ֆեյսբուքյան իր գրառումների համար և նշել, որ չի աջակցում ահաբեկչությանը։
Իր գրառումներում Նիկոլայ Կոնաշենոկը զարմացել է, թե ինչու է ահաբեկչությունը տեղի ունեցել «Կրոկուս սիթի հոլլ»-ում, այլ ոչ թե Կրեմլում, և Պիկնիկ խմբի համերգից առաջ, այլ ոչ թե մեկ այլ երաժշտական խմբի։ Մարտի 25-ին, տղամարդու ձերբակալությունից քիչ առաջ, Սանկտ Պետերբուրգի «Նոր Հոլանդիա» հանրային տարածքը հայտարարեց նրա կնոջ՝ Ռոքսանա Շատունովսկայայի տնօրենի պաշտոնից հեռանալու մասին։ Կինը պատմել է, որ իր ընտանիքի անդամն իրեն «թույլ է տվել հրեշավոր» հայտարարություններ անել, որոնք ինքը դատապարտում է, գրում է «Կոմերսանտը»։
