Քիչ առաջ Հայաստանում Իրանի դեսպանատուն այցելեց ՀՀ Ազգային ժողովի նախագահ Ալեն Սիմոնյանը, ով նաեւ գրառում արեց սգո մատյանում:
Դուրս գալուց հետո նա լրագրողների հետ զրույցում ասաց. «Շատ ցավալի իրադարձություն է, ես պատիվ եմ ունեցել թե Իրանի նախագահի, թե ԱԳ նախարարի հետ հանդիպում ունենալ: Նրանք եւ մեր երկրի համար, եւ տարածաշրջանի համար շատ ակտիվ աշխատանք ու ջանքեր էին դնում: Իրոք շատ ցավալի է, ցավակցում եմ բարեկամ երկրի ժողովրդին այս շատ անսպասելի ու անհասկանալի իրադարձության հետ կապված:
Երեւի արդեն գիտեք, որ հաջորդիվ նախատեսվում էր Իրանի նախագահի այցը Հայաստանի Հանրապետություն: Դա մեզ համար շատ կարեւոր էր եւ հիմա մենք նույնպես ցավում ենք այս ողբերգության հետ կապված»:
Հիշեցնենք, որ այս պահին Հայաստանի բարձրաստիճան պաշտոնյաներն այցելում են ՀՀ–ում Իրանի դեսպանություն՝ հարգանքի տուրք մատուցելու Իրանի նախագահ Իրանի նախագահ այաթոլլա Սեյեդ Էբրահիմ Ռայիսիի, ԱԳ նախարար Հոսեյն Ամիր Աբդոլլահիանի և ուղղաթիռում գտնվող ուղեկցող պաշտոնյաների ողբերգական մահվան կապակցությամբ:
Նախօրեին Իրանի դեսպանատունը հաղորդագրություն էր տարածել՝ նշելով, որ Իրանի Իսլամական Հանրապետության դեսպանատանը մայիսի 22-ին եւ 23-ին կբացվի Սգո մատյան, որտեղ հնարավոր կլինի գրառում կատարել:
Այսօր ՀՀ վարչապետ Նիկոլ Փաշինյանն աշխատանքային այցով մեկնել է Իրանի Իսլամական Հանրապետություն, որտեղ կմասնակցի ԻԻՀ նախագահ Էբրահիմ Ռայիսիի, Արտաքին գործերի նախարար Հոսեյն Ամիր Աբդոլլահիանի և նրանց ուղեկցողների հարգանքի տուրքի և ցավակցություն հայտնելու պաշտոնական միջոցառմանը: