Ռուսաստանը ողջունում է Հայաստանի եւ Ադրբեջանի արտաքին գործերի նախարարների խաղաղության պայմանագրի վերաբերյալ բանակցությունները, որոնք տեղի են ունեցել Ալմաթիում (Ղազախստան) մայիսի 10-11-ին, այս մասին News.ru-ի հարցազրույցում ասել է ՌԴ փոխարտգործնախարար Միխայիլ Գալուզինը։
«Ողջունում ենք մայիսի 10-11-ին Ալմաթիում Ադրբեջանի եւ Հայաստանի արտգործնախարարների բանակցությունները խաղաղության պայմանագրի վերաբերյալ։ Կատարվել է եւս մեկ քայլ Հարավային Կովկասում հուսալի եւ երկարաժամկետ խաղաղության եւ կայունության հասնելու համար։ Ամբողջովին պաշտպանում ենք Աստանայի ջանքերն այս ուղղությամբ։ Եթե նայենք պատմությանը, ապա Ղազախստանն էական ավանդ է ներդրել 1991թ. սեպտեմբերին Ժելեզնովոդսկի հռչակագրի մշակման եւ ընդունման գործում, դա ղարաբաղյան հակամարտության գոտում ռազմական դիմակայությունը դադարեցնելու առաջին լուրջ փորձերից մեկն էր։
Կարեւոր է, որ շփումներն Ալմաթիում ընթանում են 2020-2022թ. բարձրամակարդակ եռակողմ պայմանավորվածությունների հունով, որոնք սահմանել են Բաքվի եւ Երեւանի միջեւ հարաբերությունների կարգավորման «ճանապարհային քարտեզը»,-ասել է Գալուզինը։
Խոսելով Հարավային Կովկասում տրանսպորտային հաղորդակցությունների ապաշրջափակման մասին՝ Գալուզինը ուշադրություն է դարձրել այն բանին, որ Ռուսաստանը չի օգտագործում Ադրբեջանի նախագահի մտցրած «Զանգեզուրի միջանցք» տերմինը։ «Ռուսաստանը հանդես է գալիս ոչ թե ինչ-որ կոնկրետ երթուղու ստեղծման, այլ Հարավային Կոկասում տնտեսական եւ տրանսպորտային հաղորդակցությունների լիակատար ապաշրջափակման օգտին։ Հենց դրանով է զբաղվում Ռուսաստանի, Ադրբեջանի եւ Հայաստանի ղեկավարների որոշմամբ 2021թ. ստեղծված եռակողմ աշխատանքային խումբը երեք երկրների փոխվարչապետերի համատեղ համանախագահությամբ»,- նշել է Գալուզինը;
Նրա խոսքով՝ եռակողմ աշխատանքային խումբը ռիթմիկ աշխատանք է կատարել եւ կարողացել է հասնել զգալի արդյունքների։ Փոխնախարարի խոսքով՝ 2023թ. հունիսին ձեռք է բերվել ընդհանուր ընկալում Հայաստանի եւ Ադրբեջանի միջեւ երկաթուղային կապի վերականգնման հարցում։ Նա ավելացրել է, որ կողմերը գրեթե հասել են համակարգային եւ հավասարակշռված պայմանավորվածության։
Գալուզինն ասել է, որ այդ գործընթացը կանգ է առել, բայց ոչ Ռուսաստանի մեղքով։ Նրա խոսքով՝ Երեւանը որոշում է կայացրել սառեցնել փոխգործակցությունը եռակողմ աշխատանքային խմբի մակարդակով։