Նարեկ Սամսոնյանի և Վազգեն Սաղաթելյանի գործով անպայմանորեն ԲԴԽ-ից և քաղաքական բարձր իշխանությունից հանձնարարություններ տրվել են: Այս մասին «Իմնեմնիմի»-ի գործով դատավարությունից հետո, երբ նիստը նախագահող Տիգրան Ոսկանյանն ինքնաբացարկ հայտնեց, դատարանի մոտ լրագրողների հետ զրույցում նշեց Վազգեն Սաղաթելյանի փաստաբան Արսեն Բաբայանը։
«Ճնշումներ որ կան բոլոր դատավորների նկատմամբ, հաստատվել է վաղուց՝ Նարեկի ու Վազգենի կալանքը և ընդհանրապես այն, որ այս գործը գոյություն ունի մինչև հիմա, դրանով հաստատվել է։ Թե կոնկրետ այս գործով ինչ աստիճանի հանձնարարական է տրվել դատավորին և նա ինչքանով է կարողացել հնարավոր հանձնարարությանը դիմադրել՝ չեմ կարող ասել»,-ասաց Բաբայանը։
Թե ինչ սպասելիքներ կան՝ Բաբայանը նշեց. «Եթե կվերամակագրվի այնպիսի դատավորի, որը կունենա ուժ, արդարադատություն իրականացնելու իրական կարողություն, կարող ենք ակնկալել որոշակի հույսեր։ Այս դատավորը կոնկրետ այդպիսն էր և ապացուցել էր նախկին դատական ակտով։ Սակայն գտավ, որ ինքը չպետք է քննի այս գործը, որ կարող է հասարակության մոտ կասկած առաջանալ՝ ինքը անաչառ չի։ Ափսոսում եմ, քանի որ փորձից գիտենք, որ գործ ունեինք արդարադատություն իրականացնող քիչ մնացած դատավորներից մեկի հետ»,-ասաց Բաբայանը։
Հիշեցնենք` մարտի 22-ի առավոտյան ոստիկանության աշխատակիցները բիրտ ուժի կիրառմամբ ձերբակալել էին Նարեկ Սամսոնյանին, ապա կալանավորել։ Այնուհետև իրավապահները գնացել էին նաև Վազգեն Սաղաթելյանի տան մոտ և նրան նույնպես ձերբակալել ու կալանավորել։
Նրանց մեղադրանք է առաջադրվել հաղորդակցական տեխնոլոգիաներն օգտագործելով խմբի կազմում խուլիգանություն կատարելու համար։
