Խոսե Ռաուլ Մուլինոն Պանամայի նախագահական ընտրություններում հավաքում է ձայների ավելի քան 34%-ը՝ հիմնված ընտրատեղամասերի ավելի քան 55%-ի տվյալների վրա։ Քվեարկության արդյունքներն ուղիղ եթերով հեռարձակվում են Պանամայի ընտրական տրիբունալի YouTube ալիքով։
Հանրապետության նախկին նախագահ Ռիկարդո Մարտինելիի «Հասնել նպատակին» կուսակցության կողմից առաջադրված Մուլինոն առայժմ հավաքում է ձայների 34,07 տոկոսը։ Երկրորդ տեղում՝ ձայների 24,75%-ով, Ռիկարդո Լոմբանան է՝ կոռուպցիայի դեմ պայքարի արդյունքում 2022 թվականին ի հայտ եկած «Այլ ուղի» շարժման առաջնորդը։ Լավագույն եռյակը եզրափակում է Պանամայի նախկին նախագահ Մարտին Տորիյոսը` ձայների 15,84%-ով։ Ընտրություններին մասնակցությունը կազմել է 76,7 տոկոս։
Հաղթողը, ով կգլխավորի Պանաման մինչև 2029 թվականի հունիսի 30-ը, որոշվում է ձայների պարզ մեծամասնությամբ։ Թույլատրվում է միայն մեկ փուլ։
Ըստ վերլուծաբանների՝ Մուլինոն իր ժողովրդականության համար պարտական է Մարտինելիին, ով երկիրը ղեկավարել է 2009-2014 թվականներին։ Ի սկզբանե Մուլինոն Մարտինելիի հետ միասին պետք է առաջադրվեր որպես փոխնախագահ, սակայն դատարանը պետության նախկին ղեկավարին դատապարտեց 11 տարվա ազատազրկման՝ փողերի լվացման համար։
Մուլինոն կառավարման մեծ փորձ ունի: Նա ղեկավարել է արտաքին գործերի, հասարակական անվտանգության և արդարադատության նախարարությունները։ Քաղաքական գործիչը խոստանում է լուծել գործազրկության ու հանցավորության խնդիրները, լուծել ջրամատակարարման իրավիճակը, բարելավել հասարակական տրանսպորտը՝ ընդլայնելով մայրաքաղաքի մետրոպոլիտենի ցանցը։
