2023 թվականին Հայաստանում գրանցվել է 40 հազար 666 հանցագործություն։ Այս մասին Ազգային ժողովում ապրիլի 29-ին ՀՀ գլխավոր դատախազության 2023 թվականի գործունեության հաշվետվության քննարկման ժամանակ ԱԺ պետաիրավական հարցերի մշտական հանձնաժողովի նիստում ասաց գլխավոր դատախազ Աննա Վարդապետյանը։
Նրա խոսքով՝ 2022 թվականի համեմատ հանցագործությունների աճը կազմել է 8,1 տոկոս։ «2023 թվականին գրանցվել է առանձնապես ծանր հանցագործության 1678 դեպք, իսկ 2022 թվականին՝ 880 դեպք։ 40666 դեպքից 80,9 տոկոսը եղել է ոչ մեծ ծանրության և միջին ծանրության հանցագործություն»,- ասաց Վարդապետյանը։
Նա նաև խոստովանել է, որ երկրում գրանցվել է հանցագործությունների բացահայտման 15 տոկոս անկում։ «Ձերբակալվել է 8 հազար 645 մարդ։ Նրանցից 7160-ն ազատ է արձակվել օրենքով նախատեսված հիմքերով։ Այսինքն՝ նրանց նկատմամբ լրացուցիչ խափանման միջոց չի կիրառվել։ Նախորդ տարի քրեական հետապնդում է հարուցվել 10 հազար 136, իսկ 2022 թվականին՝ 8005 անձի նկատմամբ։ 2023 թվականին կալանքը որպես խափանման միջոց ընտրելու 2040 միջնորդություն է ներկայացվել»,- ասաց գլխավոր դատախազը։