Չինաստանի արտաքին գործերի նախարար Վան Ին և ԱՄՆ պետքարտուղար Էնթոնի Բլինքենը Պեկինում կայացած հանդիպումից հետո պայմանավորվել են շարունակել աջակցել չին-ամերիկյան հարաբերությունների կայունացմանն ու զարգացմանը։ Այս մասին ասվում է Չինաստանի ԱԳՆ հայտարարության մեջ։
«Երկու կողմերը պայմանավորվել են շարունակել ջանասիրաբար աշխատել՝ կայունացնելու և զարգացնելու Չինաստան-ԱՄՆ հարաբերությունները՝ երկու պետությունների ղեկավարների հանձնարարականներին համապատասխան», - ասվում է գերատեսչության կայքում տեղադրված հաղորդագրության մեջ:
Փաստաթղթում նշվում է, որ կողմերը հաստատել են 2023 թվականի նոյեմբերին Սան Ֆրանցիսկոյում երկու երկրների ղեկավարների հանդիպումից հետո տարբեր ոլորտներում գրանցված առաջընթացը։ Կողմերը նաև պայմանավորվել են պահպանել փոխանակումները և շփումները բոլոր մակարդակներում, մասնավորապես՝ դիվանագիտության, տնտեսության, ֆինանսների, առևտրի, կլիմայի և ռազմական ոլորտներում։
