Սանկտ Պետերբուրգի իշխանությունները նախատեսում են անօդաչուների գրոհների հետևանքների մասին տեղեկատվության տարածման արգելք մտցնել։ Նահանգապետ Ալեքսանդր Բեգլովի համապատասխան որոշման նախագիծը հրապարակվել է քաղաքապետարանի կայքում, հաղորդում է Meduza-ն։
«Որոշում եմ Սանկտ Պետերբուրգի տարածքում արգելել անօդաչու օդային, ստորջրյա և վերջրյա նավերի և սարքերի, անօդաչոի տրանսպորտային միջոցների, անօդաչու մեքենաների և այլ ավտոմատացված անօդաչու համակարգերի կիրառման հետևանքների մասին ցանկացած տեղեկատվության, այդ թվում՝ ֆոտո և վիդեո նյութերի տարածումն ու հրապարակումը»,- ասվում է փաստաթղթում։
Արգելվում է նաև «ցանկացած տեղեկատվության տարածումը, որը նպաստում է ՊՆ ուժերի, կապի համակարգերի կառույցների, վառելիքաէներգետիկ համալիրի, արդյունաբերության օբյեկտների, կամուրջների և նավահանգստային գոտիների տեղակայման վայրերի բացահայտմանը»:
Փաստաթղթի հակակոռուպցիոն փորձաքննությունը կտևի ապրիլի 22-ից մայիսի 5-ը։ Բանաձևի նախագծում չի նշվում, թե ինչ պատիժ է նախատեսված արգելքը խախտողների համար։
2024 թվականի մարտին նման արգելք էին մտցրել Լենինգրադի և Կուրսկի շրջանների իշխանությունները։ Դա նախաձեռնել է մարզային օպերատիվ շտաբը։ Արգելքի խախտման համար նախատեսված են տուգանքներ հազարից մինչև երեք հազար ռուբլի: