Ռումինիայում սկսվել են ՆԱՏՕ Sea Shield 24 ռազմածովային զորավարժությունները, մասնակցում են դաշինքի անդամ 12 երկրներ եւ նրանց գործընկերները՝ Բուլղարիան, Մեծ Բրիտանիան, Հունաստանը, Վրաստանը, Իտալիան, Մոլդովան, Նիդեռլանդները, Լեհաստանը, Պորտուգալիան, ԱՄՆ-ն, Թուրքիան եւ Ֆրանսիան։ Գործի են դրված 2,2 հազար զինվորական, 135 միավոր մարտական տեխնիկա՝ 27 ծովային եւ գետային նավեր, 17 ինքնաթիռներ եւ 91 մեքենա։ Զորավարժությունները կավարտվեն ապրիլի 21-ին։
«Մենք գործողություններ կիրականացնենք սուզանավերի դեմ, ջրային մակերեսին, ինչպես նաեւ Սեւ ծովում օդուժի դեմ եւ պատասխանատվության գետային գոտում»,- ռադիոյի հարցազրույցում ասել է ՌԾՈւ շտաբի պետ, փոխծովակալ Միխայ Պանաիտը։
«Sea Shield 24-ը ամենահամալիր զորավարժություններն են այս տարի, դրանք կնպաստեն Ռումինիայի նախաձեռնության իրականացմանն ու շահերի առաջմղմանը նաեւ միջազգային առումով, ինչպես նաեւ կբարձրացնեն փոխգործակցության մակարդակը մասնակից երկրների ուժերի միջեւ»,- ընդգծել է ՊՆ մամուլի ծառայությունը։
Sea Shield բազմազգ զորավարժություններն առաջին անգամ իրականացվել են 2015թ., վարժանքների սցենարը անընդհատ թարմացվում է, որպեսզի արագ եւ արդյունավետ համապատասխանի բոլոր սպառնալիքներին տարածաշրջանային անվտանգության եւ կայունության ոլորտում, նշվել է հաղորդագրությունում։