Էկվադորի բանտից անհետացել է հանցավոր խմբավորման պարագլուխը, որը, մասնավորապես, կասկածվում է երկրի նախագահի թեկնածուի սպանության մեջ։ Երկրում երկու ամսով արտակարգ դրություն է հայտարարվել։
Ադոլֆո Մասիյաս Վիլյամարը՝ Ֆիտո մականունով, նստած էր արդեն 12 տարի եւ բանտից գլխավորում էր «Լոս Չոներոս» («Չոնե քաղաքի մարդիկ») հզոր մաֆիոզ խմբավորումը։ Վիլյամարի բանտախուցը Գուայակիլ քաղաքի բանտի այն մասում է, որը տեսականորեն պետք է առանձնապես մանրակրկիտ պահպանվեր։
Էկվադորի նախագահ Դանիել Նոբոան 60 օրով արտակարգ դրություն է հայտարարել, որը նախատեսում է, մասնավորապես, հանրային հավաքների ժամանակավոր արգելում եւ պարետային ժամ։
Նախագահ Նոբոայի խոսքով՝ արտակարգ դրության ռեժիմը թույլ կտա զինվորականներին եւ ոստիկանությանը ուղիղ վերահսկել երկրի բանտերը։
