Անկարայի կենդանաբանական այգում բենգալյան վագրը վանդակաճաղերը լայնացնելով անցել է հարեւանությամբ գտնվող առյուծի վանդակ եւ պատառ-պատառ արել առյուծին։
Թուրքական Posta-ի փոխանցմամբ՝ օրեր առաջ առավոտյան Անկարայի Աթաթուրքի անվան կենդանաբանական այգու աշխատակիցները աշխատանքի են եկել եւ նկատել, որ բենգալյան վագրը անհետացել է վանդակից։ Սարսափահար աշխատակիցներն ավելի ուշ վագրին հայտնաբերել են հարեւանությամբ գտնվող առյուծի վանդակում քնած։ Իսկ վագրի կողքին եղել է առյուծի պատառոտված լեշը։ Կենդանաբանական այգու աշխատակիցները վագրին քնաբեր են ներկարկել եւ տեղափոխել իր վանդակ եւ կրկին ամրացրել վանդակաճաղերը։
Պարզվել է, որ բենգալյան վագրը կարողացել է վանդակաճաղերը լայնացնելով մտնել առյուծի վանդակ, եւ իր մեծ չափերի շնորհիվ պատառոտել առյուծին։
Այս ամենը տեղի է ունեցել այն ժամանակ, երբ կենդանաբանական այգին փակ է եղել այցելուների համար։ Հիշյալ հանգամանքը մտահոգությունների տեղիք է տվել թուրք հասարակության շրջանում, քանի որ նույնկերպ վագրը կարող էր դուրս գալ եւ վնաս հասցնել քաղաքացիներին։
Հայտնի է, որ այդ բենգալյան վագրը 2007-ին բերվել էր մի հանցագործ խմբավորման պարագլուխ Մեհմեդ Սելահաթինի Մերիհի առանձնատնից։ Հանցախմբի անդամները իրենց զոհերին տանում էին այդ առանձնատուն եւ վախեցնում վագրով։
Հանցախմբի բացահայտվելուց հետո բենգալյան վագրը տեղափոխվել է Գազիանթեփի, այնուհետ՝ Անկարայի կենդանաբանական այգի։
