«Էկոլուրը» տեղեկացնում է, որ Դիլիջանը կրկին այրվում է: Դեկտեմբերի 29-ին` ժամը 13:00-ի դրությամբ, դեռ չէր հաջողվել մարել հրդեհը «Դիլիջան» ազգային պարկի տնօրեն Աշոտ Դավթյանը «Էկոլուր»-ին հայտնել է, որ համատեղ ուժերով գիշերը հաջողվել է կանգնեցնել հրդեհը, որը հասնում էր սոճու անտառին:
Շարունակում են այրվել մարգագետինների դժվարանցանելի հատվածները: «Տարվա սկզբից մենք հրդեհի մոտ 70 դեպք ունենք: Հիմնականում այրվում են մարգագետինները, բայց եթե անտառն այրվի, ապա ծայր աստիճան դժվար կլինի կանգնեցնել հրդեհը»,- ասաց Դավթյանը:
Հրդեհների մասին լուրը տարածել էր Դիլիջանի «Օրհուս» կենտրոնը, որի համակարգող Արարատ Ալիխանյանը մտավախություն հայտնեց հրդեհների շարունակականության վերաբերյալ` նշելով, որ բազմաթիվ դեպքերում դիտավորյալ են հրդեհում: