Արցախի իշխանությունները երևիցե չեն ասել, թե հրաժարվում են Արցախից: Այս մասին NEWS.am-ի հետ զրույցում ասաց Արցախի պատգամավոր Դավիթ Մելքումյանը։
Նշենք՝ Դավիթ Մելքումյանը այն պատգամավորն է, որը Արցախի հայաթափումից առաջ Բաքվի հետ բանակցելու էր գնացել Եվլախ։
«Արցախի իշխանությունները երևիցե հայտարարություններ չեն արել, թե մենք հրաժարվում ենք Արցախից, որովհետև այսուհետ դա մեր օրակարգում չէ, կարծեմ Արցախի իշխանությունները երբևիցե նման հայտարարություն չեն արել։ Արցախի իշխանությունները չեն հանձնել Արցախը, առաջիկայում կխոսենք այն մասին, թե ով է հանձնել Արցախը»,- նշեց Դավիթ Մելքումյանը։
Անդրադառնալով իր և Ադրբեջանի խորհրդարանի պատգամավոր Ռամին Մամեդովի հետ հանդիպմանը՝ նա չցանկացավ հանդիպումից փակագծեր բացել․ «Առաջարկում եմ այսօրվա թեմայից խոսենք»։
Հարցին՝ արդյո՞ք իրենք հույս ունեն, որ Նիկոլ Փաշինյանը հրաժարական կտա, Մելքումյանն ասաց․ «Ես առհասարակ հույսի վրա չեմ դնում հույսս, ամեն ինչը ժողովրդի ձեռքին է։ Հանդիպումը բավականին հետաքրքիր անցավ, բացի էմոցիոնալ կոմպոնենտից ավելի գործնական, այսինքն՝ ծրագրային, ինչպիսի ծրագրեր են սպասվում առաջիկայում, ինչ գործընթացներ են սպասվում, մենք հիմնականում նման բաների վրա ենք կենտրոնացել։ Հանդիպումից բավական տպավորված եմ»։
Հարցին՝ ինչո՞ւ Արցախի նախագահ Սամվել Շահրամանյանը չի միանում շարժմանը՝ Դավիթ Մելքումյանն ասաց․ «Չգիտեմ, իրենից հարցրեք, մենք այսօր այստեղ են որպես մարդիկ, ովքեր մտահոգված են Հայաստանի ապագայով, մենք այսօր որպես քաղաքական գործիչներ չենք այստեղ»։