Դա աբսուրդ է, Բագրատ Սրբազանին որևէ մեկը չի պատրաստվում ընտրել ու դա քննարկել։ Այս մասին, այսօր՝ մայիսի 21-ին, ԱԺ-ում լրագրողների հետ զրույցում նշեց ԱԺ նախագահ Ալեն Սիմոնյանը՝ անդրադառնալով հարցին՝ արդյոք ինքը բացառում է, որ ՔՊ-ն կարող է Բագրատ Սրբազանին ընտրել վարչապետի պաշտոնում:
«Բացի այդ, Բագրատ Սրբազանն օրենքով իրավունք չունի դառնալ վարչապետ և թեկնածություն առաջադրել»,-ասաց նա:
Հարցին՝ ի՞նչ են անելու, եթե հրապարակը ճնշի իշխանություններին, Ալեն Սիմոնյանն ասաց․ «Այսինքն, հրապարակը որ ճնշի Սահմանադրությունը պետք է քանդե՞նք։ Դա հակասահմանադրական է»:
Լրագրողները հիշեցրին, որ Փաշինյանի կոչով էլ դատարաններն են շրջափակվել, ինչին ի պատասխան Սիմոնյանն ասաց․ «Եթե ժողովուրդը հավաքվում է դատարանի մոտ, դա դառնո՞ւմ է սահմանադրական կարգի տապալում։ Նման բան չկա, չի քննարկվում, ու ես զարմանում եմ, որ ինչ-որ մարդիկ մտածում են նման բան գեթ մեկ մարդ կարող է քննարկել։ Ոչ մի ինտրիգ, ոչ մի արտառոց բան իշխանության մոտ չի կատարվում, մենք շատ ուրախ ենք, որ ՀՀ-ում քաղաքական գործընթացներ են»։