Մրցակցության պաշտպանության հանձնաժողովի նախագահ Գեղամ Գևորգյանը ելույթ է ունեցել Կոստա դու Սաուիպե քաղաքում տեղի ունեցած «Մրցակցության միջազգային ցանց» կազմակերպության (ICN) տարեկան համաժողովին՝ ներկայացնելով Հայաստանի մրցակցային մարմնի կողմից Մրցակցության միջազգային ցանցի լավագույն փորձի կիրարկման արդյունքները։
Հանձնաժողովից NEWS.am-ին հայտնում են, որ քննարկմանը մասնակցում էին նաև Կանադայի, Իսպանիայի Թագավորության և Ֆիջիի Հանրապետության մրցակցային մարմինների ներկայացուցիչները:
Գեղամ Գևորգյանը մասնավորապես ընդգծել է Մրցակցության միջազգային ցանցի փորձի կիրառումը ոլորտային ուսումնասիրությունների իրականացման ձեռնարկի մշակման հարցում: Ներկայումս աշխատանքներ են իրականացվում ՄՊՀ միջնաժամկետ ռազմավարության, շահերի պաշտպանության ռազմավարության, ինչպես նաև համակենտրոնացումների գնահատման ուղեցույցի մշակման ուղղությամբ:
Համաժողովի շրջանակում ՄՊՀ նախագահը հանդիպում է ունեցել Իտալիայի մրցակցային մարմնի նախագահ Ռոբերտո Ռուստիչելիի հետ: Քննարկվել են հետագա համագործակցության խորացման երկկողմ հետաքրքրություն ներկայացնող մի շարք հարցեր: Պայմանավորվածություն է ձեռք բերվել այս տարի փոխադարձ այցելություններ կազմակերպել, ինչպես նաև մեկնարկել երկու երկրների մրցակցային մարմինների միջև փոխըմբռնման հուշագրի կնքման աշխատանքները:
