Մայրաքաղաքի կենտրոնում լարված իրավիճակ է։ Քաղաքացիները Բագրատ Սրբազանի կոչով շարժվում են դեպի Օպերայի և բալետի ազգային ակադեմիական թատրոն։
Օպերայի շրջակա տարածքում գտնվող սրճարաններից մեկի աշխատակիցը հաղորդեց, որ ոստիկանները հրահանգել են այցելուներին դուրս հանել և մինչև երեկոյան ժամը 19։00-ը հյուրեր չընդունել, իսկ մեկ այլ սրճարանի աշխատակից ասաց, որ սրճարանից նույնիսկ բռնի ուժով են հեռացրել մարդկանց, որոնք չէին ցանկանում դուրս գալ։
Թումանյան փողոցը Հյուսիսային պողոտային հարող հատվածում ամբողջությամբ փակված է մետաղյա ձողերով։ Ոստիկաններն արգելում են քաղաքացիների անցումը Մաշտոցի պողոտայով:
Հիշեցնենք՝ ժամը 16:00-ին Ա. Սպենդիարյանի անվան օպերայի և բալետի ազգային ակադեմիական թատրոնում EBRD միջազգային ֆորումի շրջանակներում կայանալու է միջոցառում, որին մասնակցելու է Նիկոլ Փաշինյանը, իսկ Բագրատ Սրբազանի կոչով բակում տեղի է ունենալու բողոքի ակցիա։
Այս պահին ոստիկանական մեծաթիվ ուժեր են բերվել Երեւանի կենտրոն: Ոստիկանական բազմաթիվ մեքենաներ են կայանված Օպերայի շենքին հարակից հատվածներում: Կադրերում երեւում է, որ ոստիկաններին մահակներ են բաժանում:
Մետաղյա արգելապատնեշներով փակվել են Օպերայի շենքը շրջապատող փողոցների մայթերը: Արգելապատնեշներով շրջափակված է նաեւ Ազատության հրապարակը, որտեղ սպասվող միջոցառման շրջանակներում տաղավարներ եւ սեղաններ են տեղադրված: Քաղաքացիները ստիպված են շրջանցել արգելապատնեշները:
