Բնակչության տարհանում քաղաքից չի նախատեսվում, ընդհակառակը, քաղաքապետի խոսքով, այժմ Խարկով են գալիս մարդիկ մարզի այն բնակավայրերից, որտեղ ակտիվ մարտական գործողություններ են ընթանում ռոււսական զորքերի հարձակման պատճառով։ Այս մասին տեղեկացրել է Խարկովի քաղաքապետ Իգոր Տերեխովը։

«Ավելի քան 8 ժամ շարունակվում է օդային տագնապը, բայց գիշերը հանգիստ ենք անցկացրել։ Մեկ օրում եղել են հարձակումներ բնակելի կառույցի վրա։ Թշնամին օգտագործում է մարդկանց վախեցնելու տեխնիկա, որպեսզի մարդիկ հեռանան քաղաքից»,- նրան մեջբերել է «Украинская правда»-ն։

Չնայած արդեն քաղաք է եկել ավելի քան 6 հազար մարդ, նրանց տեղավորել են հանրակացարաններում եւ տրամադրում են «հնարավոր ամեն ինչ, որպեսզի նրանք իրենց քիչ թե շատ պաշտպանված զգան»,- ասել է քաղաքապետը։

Տերեխովը նշել է, որ քաղաքը տարհանվածների համար բավականաչափ իրեր ունի, բայց կա էլեկտրամատակարարման խնդիր։

«Մարտի 23-ի գնդակոծություններից հետո, երբ ավերեցին ՋԷԿ-ը եւ տրանսֆորմատորային ենթակայանները, մենք այսօր սեփական էլեկտրաէներգիայի գեներացիա չունենք։ Իհարկե, այդ պատճառով կան անջատումներ թե՛ ձեռնարկությունների, թե՛ բնակելիների համար։ Իրավիճակը լարված է»,- նշել է նա։