Օտարերկրյա գործակալների մասին օրենքի ընդունումը խոչընդոտ կդառնա Վրաստանի՝ դեպի ԵՄ ճանապարհին, սակայն կոնկրետ հետեւանքները կքննարկվեն դրա հաստատումից հետո, Բրյուսելում կայացած ճեպազրույցում ասել է Միության արտաքին քաղաքականության ծառայության պաշտոնական ներկայացուցիչ Պիտեր Ստանոն։
«Մենք շատ ուշադիր հետևում ենք իրադարձություններին։ Մենք արդեն ասել ենք, որ մեր կարծիքով այս օրենքը վտանգ է ներկայացնում Վրաստանի եվրոպական նկրտումների համար։ Մենք ակնկալում ենք, որ քաղաքական առաջնորդները դա չեն անի, բայց նաև հասկանում ենք, որ քննարկումները շարունակվում են։ Եթե այս օրենքն ընդունվի, այն լուրջ խոչընդոտ կդառնա Վրաստանի եվրոպական ճանապարհին։ Բայց կոնկրետ հետեւանքները մենք կքննարկենք այս օրենքի ընդունումից հետո, արձագանքը կքննարկվի ԵՄ անդամ երկրների հետ»,- ասաց Ստանոն։
Վրաստանի խորհրդարանը երեքշաբթի լիագումար նիստ է անցկացնում, պատգամավորները երրորդ և վերջին ընթերցմամբ պետք է քվեարկեն օտարերկրյա գործակալների մասին օրինագծի վերաբերյալ: Միաժամանակ, Թբիլիսիում բողոքի ցույց է տեղի ունենում։