Լրագրող Ժիրայր Ոսկանյանի հաղորդման հիման վրա ՀՀ քննչական կոմիտեում հարուցված քրեական վարույթի շրջանակներում «1896» ռեստորանը ԱՊՕՐԻՆԻ ձեւով կապարակնքվել է։ Այս մասին Facebook-ի իր էջում գրել է փաստաբան Էրիկ Ալեքսանյանը։
Նա նաեւ նշել է. «Հարկ է նկատել, որ «1896» ռեստորանում տեղի ունեցած «դեպքից» հետո քննիչը կատարել է ռեստորանի՝ որպես դեպքի վայրի զննությունը։ Այնուհետեւ առանց որեւէ պատճառաբանության կապարակնքել է տարածքը եւ արդեն մեկ շաբաթից ավել այն գտնվում է կապարահնքված վիճակում։
Որեւէ այլ գործողություն դրանից հետո չի կատարվել, իսկ մեր տեղեկություններով չի էլ պլանավորվում կատարվի։Այսինքն ակնհայտ է, որ «1896» ռեստորանը կապարակնքվել է ինքնանպատակ, ինչի արդունքում ռեստորանը կրում է ֆինանսական կորուստներ։
Ուստի հորդորում եմ ՀՀ քննչական կոմիտեին եւ ՀՀ դատախազությանը վերացնել ապօրինությունը հակառակ դեպքում ստիպված ենք լինելու դիմել դատական պաշտպանությանը»:
Նշենք, որ ըստ ՔԿ հաղորդագրության, մայիսի 5-ին Ոստիկանություն հաղորդում է ստացվել այն մասին, որ նույն օրը՝ երեկոյան, Երևան քաղաքի Թումանյան փողոցում գործող ակումբներից մեկում Մ․Բ․-ն (Միկա Բադալյան-խմբ) և նրա սեղանակիցները վիճաբանել են լրագրող Ժիրայր Ոսկանյանի հետ, ձեռքերով անհարգալից ժեստ ցույց տվել, վերցրել հեռախոսը, որը որոշ ժամանակ անց վերադարձրել են, ինչպես նաև քաշքշել են նրան՝ պատճառելով ֆիզիկական ցավ։
Ստացված հաղորդման առթիվ ՀՀ քրեական օրենսգրքի 297-րդ հոդվածի 2-րդ մասի 1-ին կետի (խմբի կազմում խուլիգանությունը) և 460-րդ հոդվածի 1-ին մասի (ինքնիրավչությունը) հատկանիշներով նախաձեռնվել է քրեական վարույթ։
Ժիրայր Ոսկանյանը ճանաչվել է տուժող։
