Սահմանազատման պրոցեսը Տավուշում չի դադարեցվել: Այս մասին, այսօր՝ մայիսի 13-ին, ԱԺ-ում լրագրողների հետ զրույցում հայտնեց ՔՊ-ական պատգամավոր Վահե Ղալումյանը:
«Եթե խոսքը Կիրանցում խնդրահարույց երեք կետերի մասին է, դա որոշ ժամանակով սառեցվել էր բնակիչների կողմից ներկայացված սեփականության վկայականները համեմատելու համար: Դրանք պետք է համեմատվեն սահմանակետերին դրվող սյուների հետ: Չգիտեմ՝ քանի սեփականության վկայականի մասին է խոսքը:
Եթե Երեւանում էլ երկու հարեւանի կադաստրի վկայականները իրար հետ համեմատենք, շեղումներ հնարավոր են: Սահմանում էլ հնարավոր են այդպիսի փոքր շեղումներ: Սահմանագիծը քարտեզի վրա, որ տեղադրում են, մինչեւ 100-120 մետր շերտ է կազմում:
Կիրանցի գյուղապետը չի ասել, որ դեպի մեզ հողեր են անցել, միայն ասել է, որ սահմանգը գծվում է այնպես, ինչպես եղել է»,-ասաց նա՝ հավելելով, որ ճիշտ չեն տեղեկությունները, թե Կիրանցում փողոցներ են փակվում:
Ղալումյանն ասաց, որ չգիտի՝ որ թվականի քարտեզով է իրականացվում սահմանազատումը, բայց այդ գործընթացի հիմքում քարտեզ կա դրված»:
