Գերմանական պաշտպանական Rheinmetall կոնցեռնը Ուկրաինային «հարյուր հազարավոր» արկեր է խոստացել ընթացիկ տարում։ Կոնցեռնի տնօրեն Արմին Պապերգերը Դյուսելդորֆի արդյունաբերական ակումբի գործարար լրագրողների ասոցիացիայի կազմակերպած միջոցառման ժամանակ հայտնել է, որ հրետանին եւ դրա զինամթերքները ժամանակակից պայքարի կարեւոր օղակներն են, գրել է Handelsblatt թերթը։
Նրա խոսքով՝ Ռուսաստանն ավելի շատ հրետանային զինամթերքներ է արտադրում, իսկ Ուկրաինան կարող է դրան պատասխանել միայն սահմանափակ քանակությամբ։ Կոնցեռնի տնօրենը նշել է, որ Եվրոպայում եւ ԱՄՆ-ում հրետանային զինամթերքների արտադրահզորությունները վերջին տարիներին կրճատվում են։
«Արեւմտյան աշխարհը պատրաստ չէ սովորական պատերազմի։ Հրետանին փոխում է խաղի կանոնները»,- նրան մեջբերել է պարբերականը մայիսի 3-ի հրապարակման մեջ։
Պապերգերը խոստացել է, որ այս տարի Դյուսելդորֆի ընկերությունը Ուկրաինա կմատակարարի «հարյուր հազարավոր արկեր»։ Եվ դրանց մեջ կլինեն 100 կիլոմետր հեռահարությամբ հրետանային արկեր։
Մայիսի 1-ին Bild-ը տեղեկացրել էր, որ ձախ արմատականները հրկիզել են Rheinmetall պաշտպանական կոնցեռնի ղեկավար Արմին Պապերգերի ամառանոցային տնակը Ստորին Սաքսոնիայում Ուկրաինային զենք տրամադրելու պատճառով։ Հրդեհից հետո արմատականները Indymedia պլատֆորմում ուղերձ են հղել, որում ստանձնել են կատարվածի պատասխանատվությունը։