Իրաքն առաջին անգամ երկար տարիներ հետո ստեղծել է 2 ռազմակայան Թուրքիայի հետ սահմանին, գործընթացը տեղի է ունեցել Անկարայի հետ համակարգմամբ, տեղեկացրել է Hürriyet թերթը՝ հղում կատարելով աղբյուրներին։
«Իրաքն առաջին անգամ Պարսից ծոցում պատերազմից հետո ստեղծել է երկու ռազմակայան մեր սահմանին մոտ։ Այդ որոշումն ընդունվել է Թուրքիայի հետ համակարգմամբ։ Այդ ռազմակայանները չեն ստեղծվել Թուրքիայի դեմ։ Հակառակը, դրանք ստեղծվել են սեփական սահմանների պաշտպանության համար, Թուրքիայի նյութատեխնիկական աջակցությամբ»,- գրել է պարբերականը։
Թերթը նաեւ տեղեկացրել է Իրաքի հյուսիսում Թուրքիայի ԶՈւ ռազմական գործողության պատրաստվելու մասին՝ ընդդեմ երկրում արգելված Քուրդիստանի աշխատավորական կուսակցության։
«Նախապատրաստությունն ընթանում է մեծ թափով։ Ռազմակայաններն ամրացվում են, ստեղծվում են նորերը։ Մեր ռազմական ներկայությունը տարածաշրջանում ուժեղանում է։ Բայց մեծ իրաքյան գործողություն դեռ չի սկսվել։ Եթե մի անգամ գիշերը տեսնեք, թե ինչպես են ռազմական ինքնաթիռները թռչում եւ մեր զորքերն ինչպես են սկսում հատել իրաքյան սահմանը, իմացեք, որ իրաքյան գործողությունն սկսելու կոճակը արդեն սեղմվել է»,- գրել է թերթի՝ կառավարական շրջանակներին մոտ կանգնած սյունակագիր Աբդուլքադիր Սելվին։
