Հայաստանի բոլոր բնագավառներից այստեղ մարդիկ կան, որոնք իրենց աջակցությունն են հայտնում միայնակ ամբողջ մի պետական համակարգի դեմ կռվի դուրս եկած ժողովրդին: ՀՀ քաղաքացին միայնակ պայքարում է իշխանությունների դեմ, որոնք պարտավոր են պահպանել Հայաստանի տարածքային ամբողջականությունը, բայց այն հանել են մեծ աճուրդի: Իրենց իշխանությունը պահելու համար աճուրդի են հանել Հայաստանի տարածքային ամբողջականությունը, և տալիս են հողերը՝ համարելով՝ որ դրանք ադրբեջանական են: Այս մասին այսօր՝ ապրիլի 26-ին, Կիրանցում NEWS.am-ի հետ զրույցում ասաց «Պատիվ ունեմ» խմբակցության անդամ Թագուհի Թովմասյանը:
«Էս մարդիկ ունեն ՀՀ Կադաստրի կոմիտեի կողմից տրված վկայականներ իրենց տան, հարակից տարածքների համար: Եթե Կադաստրի կոմիտեն տվել է վկայականներ, որ սա ՀՀ սեփականությունն է, դուք ո՞նց եք ասում դա Հայաստանը չի: Այսինքն դուք պետական ինստիտուտներում չե՞ք հասկացել՝ որտեղ ա սկսում ու ավարտվում մեր հայրենիքը»,-ասաց նա:
Նրա խոսքով, մարդիկ պետք է հասկանան, որ տեղի ունեցողը սահամանզատում չէ, այլ միակողմանի հանձնում:
«Սահմանազատումը լինում է երկկողմանի, փոխհամաձայնեցված, բայց այս պրոցեսը նշանակում է կապիտուլացիա, որովհետև եթե ես քեզ ստիպում եմ, ասում եմ եթե չանես, կսպանեմ, ուրեմն դա կապիտուլացիա է, բա էլ կապիտուլացիան ո՞նց է լինում: Դու տենց արեցիր, որ Արցախը կորցրինք»,-հավելեց պատգամավորը՝ դիմելով իշխանություններին:
Թագուհի Թովմասյանն ասաց , որ ՀՀ քաղաքացին պիտի կանգնի տավուշցու կողքին, որովհետև տավուշցին այսօր պայքարում է Հայաստանի տարածքային ամբողջականության համար:
Պատգամավորը պատմեց նաև Հայաստանում ԵՄ դեսպան Վասիլիս Մարագոսի հետ իր ունեցած հանդիպման մասին՝ շեշտելով, որ ունեցել են քննարկում կարևոր մի շարք թեմաների շուրջ:
«Մենք շոշափել ենք բոլոր այն հարցերը, որոնք առաջանում են ՀՀ քաղաքացու մոտ: Քաղաքացին այսօր բարձրաձայնում է հարցեր Հայաստանի տարածքային ամբողջականության, մեր անվտանգության հետ կապված: Այսօր ՀՀ-ն կանգնած է լինել, չլինելու վտանգի առաջ: Ինչքան էլ խոսեն, որ մենք 29 հազար 800 քառակուսու տերն ենք, էդպես չի: Նախ, 29 հազար 800-ը դուք որտեղի՞ց եք վերցրել, եթե մենք տարբեր քարտեզներով կարող ենք խոսել մինչև 31 հազար քառակուսու մասին»,-պարզաբանեց պատգամավորը:
Նա՝ իր խոսքով, ԵՄ դեսպանի հետ քննարկել է նաև Արցախի մասին, Արցախի քաղաքացիների վերադարձի ապահովման հնարավորությունների մասին հարցերը: Նրանք զրուցել են նաև Հայաստանում ժողովրդավարության մասին, ինչպես նաև քաղբանտարկյալների առկայության մասին:
«Նիկոլ Փաշինյանն իր գոյությամբ և գործունեությամբ ոչնչացնում է Հայասատանում ժողովրդավարական ինստիտուտների բոլոր բջիջները: Ես շարունակում եմ իմ հանդիպումները միջազգային բոլոր դերակատարների ներկայացուցիչների հետ, և բարձրաձայնում եմ Հայասատնում և շուրջը տեղի ունեցողի մասին, որովհետև Նիկոլ Փաշինյանը, օրինակ, ընդհանրապես չի խոսում Արցախի մասին»:
Պատգամավորը նաև վստահ չէ, որ իշխանությունը գերիների հարցն է բարձրացնում:
