Ճապոնիան, Իտալիան և Մեծ Բրիտանիան պլանավորում են 2026 թվականին կառուցել նորագույն կործանիչի նախատիպը, որը նրանք համատեղ մշակում են, հայտնում է Nikkei թերթը։
Ներկայումս Ճապոնիայի խորհրդարանը սկսել է համաձայնագրի քննարկումը` կառավարող մարմնի ստեղծման վերաբերյալ, որը կհամակարգի երեք երկրների ջանքերը, ներառյալ կառավարությունների և մասնավոր ընկերությունների գործողությունները՝ կործանիչի ստեղծման հարցում: Կողմերը պարտավորվել են մինչև տարեվերջ ստեղծել նման կազմակերպություն, որը կկոչվի GIGO (Global Combat Air Program International Government Organization): Դրա շտաբը կլինի Լոնդոնում, այնտեղ կուղարկվեն Ճապոնիայի պաշտպանության նախարարության մի քանի տասնյակ աշխատակիցներ։
Նախնական տվյալներով՝ ճապոնական Mitsubishi Heavy Industries-ը կմշակի ինքնաթիռի ֆյուզելյաժը, ինժեներական IHI-ը՝ շարժիչները, իսկ Mitsubishi Electric-ն՝ էլեկտրոնային համակարգերը։ Բացի այդ, մշակմանը կմասնակցեն բրիտանական BAE Systems-ը և Rolls-Royce-ը, ինչպես նաև իտալական Leonardo-ն։
Նախատեսվում է, որ ինքնաթիռը շահագործման կհանձնվի մինչև 2035 թվականը։ Այն պետք է փոխարինի Mitsubishi-ի ճապոնական F-2 կործանիչ-ռմբակոծիչներին, այդ թվում՝ հակազդելու Ռուսաստանի Դաշնության, Չինաստանի և KNDO կործանիչներին, գրում է Nikkei-ն։
2022 թվականի դեկտեմբերին Ճապոնիան, Իտալիան և Մեծ Բրիտանիան պայմանավորվել են համատեղ մշակել նոր սերնդի կործանիչ, որը պետք է պատրաստ լինի մինչև 2035 թվականը։ Նախագիծն ուղղված է կործանիչի ստեղծմանը, որն այլընտրանք կլինի ԱՄՆ-ի և ԵՄ-ի մշակումներին։
