«Կրոկուս»-ում տեղի ունեցած ահաբեկչության չորս ենթադրյալ հեղինակներն այժմ գտնվում են Լեֆորտովոյի քննչական մեկուսարանում՝ մենախցում, «ՌԻԱ Նովոստիին» ասել է Մարդու իրավունքների խորհրդի (ՄԻՀ) անդամ Եվա Մերկաչևան։
«Նրանք բոլորը գտնվում են Լեֆորտովոյում, դա բացարձակապես հաստատ է: Նրանք պահվում են մենախցում և այժմ կարանտինում են»,- ասել է Մերկաչևան։
Նրա խոսքով, վիրավոր ահաբեկչի հետ կապված այժմ հարցեր կան՝ նրան նախնական կալանքի տակ են տեղափոխել նախ պատգարակով, իսկ հետո՝ անվասայլակով։
«Լեֆորտովոյի քննչական մեկուսարանում կա բուժմաս, այն բավականին լավն է և կահավորված է... Եթե հանկարծ հիվանդանա, բժիշկները հասկանան, որ չեն կարողանում գլուխ հանել, ապա հսկողության տակ նրան կտեղափոխեն քաղաքացիական հիվանդանոց»,- նշել է նա:
Մերկաչևայի խոսքով՝ փաստաբանները Լեֆորտովոյում այցելել են մեղադրյալներին։
«Սկզբում բոլորը կլինեն մեկուսարանում, իսկ հետո նրանք խցակիցներ կունենան: Լեֆորտովոյում խցերը նախատեսված են երկու հոգու համար։ Կան միայն մի քանի խցեր, որոնք նախատեսված են չորս անձի համար: Նրանց, ամենայն հավանականությամբ, կտեղավորեն երկու հոգու համար նախատեսված փոքրիկ խցում: Նրանց չի կարելի միասին պահել, քանի որ դա օրենքով արգելված է, նրանք հանցակից են»,- ընդգծել է Մարդու իրավունքների խորհրդի անդամը։
Ահաբեկչության չորս ենթադրյալ հեղինակները ձերբակալվել են մարտի 23-ին Բրյանսկի շրջանում։ ՌԴ նախագահ Վլադիմիր Պուտինն ասել է, որ նրանք փորձել են փախչել և շարժվել են դեպի Ուկրաինա, որտեղ ուկրաինական կողմից իրենց համար «պատուհան» են պատրաստել սահմանը հատելու համար։ Մոսկվայի դատարանը նրանց ձերբակալել է, նրանք են՝ Դալերջոն Միրզոևը, Մուրոդալի Ռաչաբալիզոդան, Ֆարիդուն Շամսիդինը և Մուհամմադսոբիր Ֆայզովը, նրանց մեղադրանք է առաջադրվել կազմակերպված խմբի կազմում մահապարտ ահաբեկչություն կատարելու մեջ (205-րդ հոդվածի 3-րդ մասի «բ» կետ. Ռուսաստանի Դաշնության Քրեական օրենսգիրք):
