Այսօր՝ հունվարի 17-ին, ակցիա է տեղի ունեցել Մայր Աթոռ Սուրբ Էջմիածնի դիմաց՝ ի պաշտպանություն Հայ առաքելական եկեղեցու եւ ցույց տալու համար, որ Եկեղեցին միայնակ չէ:
Ակցիայի մասնակիցներից մեկը՝ դիմելով իրենց դիմավորած հոգեւորականներին, ասաց. «Մենք եկել ենք մեր աջակցությունը եւ պաշտպանությունը ցույց տալու եկեղեցուն: Ցավոք սրտի, եկեղեցին այսօր իր հավատացյալների պաշտպանության եւ իր կողքին կանգնելու կարիքն ունի: Երեւի ստալինյան բռնաճնշումներից հետո սա եզակի դեպք է, երբ ամեն օր մենք ականատես ենք լինում Հայ առաքելական եկեղեցու հանդեպ տարաբնույթ հարձակումների եւ հարվածների: Վերջինն էլ ամանորյա ուղերձի հետ կապված չարաբաստիկ դեպքն էր: Մենք ինքնաբուխ եկել ենք մեր աջակցությունը, որդիական խոնարհումը ձեզ առաջարկելու: Պատրաստ ենք եկեղեցու կողքին կանգնել և ցանկացած տեսակի պայքարում առաջամարտիկ լինել»,- նշեց ակցիայի մասնակիցը։
Հիշեցնենք, որ առաջին անգամ նորանկախ հանրապետության պատմության մեջ ամանորի նախաշեմին կաթողիկոսի ելույթը չհեռարձակվեց Հանրային հեռուստաընկերությամբ:
Ակցիայի մասնակիցներին ընդառաջ եկան Մայր աթոռի ներկայացուցիչները։ Մայր աթոռի դիվանապետ Տեր Արշակ արքեպիսկոպոս Խաչատրյանը նշեց՝ պատմության ընթացքում եկեղեցին փորձություններ շատ է հաղթահարել, հիմա էլ պետք է հաղթահարի։
«Լինել եկեղեցու կողքին՝ նշանակում է լինել ինքդ քո կողքին, պաշտպանել քո ինքնությունը, ապրելու իրավունքը, արժանապատվությունը և ավելացնել քար քո ապագայի կառուցվող շենքին», - ասաց դիվանապետը։
Եկեղեցականները գոհունակություն հայտնեցին, որ երիտասարդները համախմբվել են և եկել իրենց աջակցությունը հայտնելու։
Ներկաները եկեղեցականների գլխավորությամբ «Հայր մեր»-ն արտասանեցին:
