Երուսաղեմի հայերը վախենում են, որ իրենց փոքր, բայց սերտ համայնքը չի գոյատևի, եթե կորցնեն Հայկական թաղամասի Կովերի այգին: Այստեղ շատ հայեր են ապրում, որոնք այստեղ են տեղափոխվել 100 տարի առաջ՝ Հայոց ցեղասպանությունից հետո։ Այս մասին գրում է Al Jazeera-ն։
Տեղեկանալով, որ վերաբնակիչները վերադարձել են Հայկական թաղամաս իր տան մոտի տարածքը բուլդոզերով մաքրելու համար, 80-ամյա պրոֆեսիոնալ լուսանկարիչ Կարո Նալբանդյանը միացել է Կովերի այգի տարածքի ակցիային։ «Մենք չենք հեռանա»,- ասել է Նալբանդյանը։
Հոկտեմբերի 26-ին Հայ Առաքելական եկեղեցու Երուսաղեմի Պատրիարքարանը հայտարարել էր, որ չեղարկում է 2021 թվականի գաղտնի պայմանագիրը անշարժ գույքի ընկերության հետ, որը ենթադրաբար կապված է վերաբնակների շահերի հետ:
Այնուհետև Xana Gardens ընկերության ներկայացուցիչները կապալառուներ, զինված վերաբնակիչներ և բուլդոզերներ է ուղարկել զավթելու հողը, որը ներառում է նաև հայկական եկեղեցու ունեցվածքը, ինչպես նաև Նալբանդյանի և չորս այլ ընտանիքների տները:
Հայկական թաղամասում կենտրոնացած է 1600-ամյա պատմություն ունեցող հայ համայնքը։
Այս հայկական համայնքի` աշխարհի ամենահին հայկական սփյուռքի բնակչությունը մեկ դար առաջ մոտավորապես 27 000 էր, սակայն նվազել է մինչև 1000-ի:
Գործարքի պայմաններով Նալբանդյանների ընտանիքը վտանգված է կորցնելու այն տունը, որտեղ ապրում է 1969 թվականից։
Կարոյի կինը՝ Հռութը, որի ընտանիքը դեռ 8-9-րդ դարերում ապրել է Երուսաղեմում, ասել է. «Ուր էլ գնանք, թվում է, թե Հայաստանում ենք»։
Կարոն իր հերթին նշել է. «Մեր գեղեցիկ հայկական թաղամասը նման չէ մյուսներին։ Մենք պետք է պաշտպանենք այն»։
Հայերը գիշերում են Այգու տարածքում, իսկ համայնքի մյուս անդամները նրանց բերում են սնունդ, թեյ և վրաններ՝ շուրջօրյա հերթապահության համար։