Իսրայելի ԱԳ նախարարությունը պետք է վերանայի Հայոց ցեղասպանության ճանաչման վերաբերյալ իր դիրքորոշումը։
Նման հայտարարությամբ ապրիլի 28-ին հանդես է եկել Իսրայելի խորհրդարանական կոալիցիայի նախագահ Զեեւ Էլկինը՝ ելույթ ունենալով Հրեական համալսարանում Ցեղասպանության 96-ամյա տարելիցին նվիրված կոնֆերանսի ժամանակ։
«Ամբողջ աշխարհից պատմական արդարություն եւ բարոյական նորմերի պահպանում պահանջող Իսրայելը չի կարող գործել հակառակ այդ կոչերի՝ առաջնորդվելով միայն նեղ քաղաքական մղումնրով։ Եկել է ժամանակը, որպեսզի Իսրայելը դադարեցնի Շիմոն Պերեսի կողմից Թուրքիային սիրաշահելու քաղաքականությանը։ Հրեական պետությունն առաջիններից մեկը պետք է պաշտոնապես ճանաչեր Հայոց ցեղասպանությունը։ Ցավոք, Իսրայելը մինչեւ հիմա չի անում դա։ Բայց լավ է ուշ, քան` երբեք»։
Էլկինը նաեւ իր խորհրդարանական ընկերներին կոչ է արել կողմ քվեարկել Ցեղասպանության ճանաչման բանաձեւին։ Նա դիմել է արտաքին եւ պաշտպանության հարցերով հանձնաժողովի նախագահ Շաուլ Մոֆազին՝ խնդրելով հանձնաժողովի շրջանակներում ավարտել հարցի քննարկումը եւ այն փոխանցել Կնեսետի հաստատմանը։
Նշենք, որ Հայոց ցեղասպանության փաստը ճանաչվել է բազմաթիվ երկրների կողմից: Առաջինը 1965 թվականին դա արել է Ուրուգվայը, որի օրինակին հետեւել են Ռուսաստանը, Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, ԱՄՆ 42 նահանգներ: Հայոց ցեղասպանությունը ճանաչել է նաեւ Վատիկանը, Եվրախորհրդարանը եւ Եկեղեցիների համաշխարհային խորհուրդը:
