Ադրբեջանի բողոքականներին սպառնում են բանտ նետել` պատարագ անցկացնելու համար: Ադրբեջանի մեծությամբ երկրորդ քաղաքում` Գյանջայում, պետական գրանցում չունեցող երեք կրոնական համայնքներին արգելել են հավաքվել ու պատարագ անցկացնել, հաղորդում է «Ֆորում-18»-ը:
Գյանջայի ոստիկանության աշխատակից Բաբեկ Սադիքովը ամբողջությամբ հերքում է դա, պնդելով, որ «ոստիկանությունը չի խոչնդոտում որեւէ մեկի աղոթքներին»: Տեղի բնակիչները, ովքեր իշխանությունների կողմից հնարավոր բռնություններից վախենալով չեն հայտնել իրենց անունները, «Ֆորում-18»-ին հայտնել են, որ համայնքներից մեկին զգուշացրել են, որ «եթե նրանք հաջորդ կիրակի կամ մեկ այլ օր աղոթելու համար հավաքվեն, նրանք կկալանավորվեն»: Ավելի ուշ ժամանել են ոստիկաններով եւ հատուկջոկատայիններով լի երկու ավտոբուսներ, որպեսզի կանխեն ցանկացած կրոնական արարողություն:
Գյանջայում Կրոնական կազմակերպությունների դեմ պայքարի պետական կոմիտեի ներկայացուցիչ Ֆիրդոուսի Քերիմովը կտրուկ հրաժարվել է քննարկել այդ հարցը «Ֆորում-18»-ի եւ կախել է լսափողը:
Նշված կոմիտեի տվյալներով, ավելի քան 300 կրոնական կազմակերպություններ դիմել են նոր օրենքի համաձայն գրանցման համար եւ մինչ օրս սպասում են:
2009-ին Ադրբեջանում ընդունված Կրոնների մասին օրենքի համաձայն, առանց պետական գրանցման ցանկացած կրոնական կազմակերպության գործունեությունը համարվում է անօրինական: